மணிப்பயல்

மூளை இருக்கா தலைவா?

2011-11-01T15:31:00.013+05:30

தசாவதானிகள் எனப்படுவோர் ஒரே நேரத்தில் 10 வேலைகள் செய்யும் திறமை பெற்றவர்கள் எனக் கூறுவார்கள்.உண்மையிலேயே அது சாத்தியமா?

கம்ப்யூட்டர் மொழியில் இதனை Multi Tasking என்று சொல்லப்படுகிறது.

அதாவது ஒரே நேரத்தில் பல செயல்கள் கம்ப்யூட்டரில் நடைபெறுவதை Multi Tasking எனக்கூறுகிறோம்.

இந்த Multi Tasking வசதி ஆரம்பகால Operting Systems - களில் கிடையாது. உதாரணமாக DOS-(Disk Operating System) எனும் Operting System ல் ஒரு நேரத்தில் ஒரு செயல் மட்டுமே நடைபெறும். அதாவது ஒரு Document டைப் செய்துகொணடிருக்கும்போது வேறு எந்த செயலும் நடைபெற முடியாது. இது போன்ற Operting System களை Single Tasking Operting System என்கிறோம்.

தற்போது பயன்படுத்தப்படும் அனைத்து Operting System (Windows XP, Linux etc..) - களிலும் Multi Tasking வசதி உள்ளது;. இவ்வகை Operting System களை Multi Tasking Operting System என்கிறோம்.

அதாவது Media Player ல் ஒரு பாடலை ஒலிக்கவிட்டுக்கொண்டே word ல் எதாவது டைப் செய்துகொண்டிருக்கலாம். அதே நேரத்தில் Virus களை தேடிக்கண்டுபிடித்து அழிக்கும்படி Antivirus Software ஐ முடுக்கி விடலாம். பின்னனியில் ஏதாவது ஒரு Document அச்சிடுவதற்காக Printer க்கு அனுப்பப்படலாம்.

இச்செயல்கள் அனைத்தும் ஒரே நேரத்தில்(Concurrently) நடைபெறுவதுபோலத் தோன்றினாலும் அவ்வாறு ஒரே நேரத்தில் நடைபெறுவதில்லை என்பதே உண்மை. அதாவது அனைத்து செயல்களும் சிறிய கால இடைவெளிகளில் மாறி மாறி சிறிது சிறிதாக நிறைவேற்றப்படுகிறது.இச்செயலை Time Slicing என்கிறோம்.

உதாரணமாக ஓட்டலில் ஒரே சர்வர் அனைத்து டேபிளிலும் அமர்ந்திருப்பவர்களுக்கும் மாறி மாறி தேவையானவற்றை வழங்கி அனைவரின் தேவைகளையும் நிறைவு செய்கிறார்.அதே நேரத்தில் ஒரு டேபிளுக்கு சேவை செய்யும்போது மற்ற டேபிளில் அமர்ந்திருப்பவர்கள் சிறிது நேரம் காந்திருக்க நேரிடுகிறது.

கம்ப்யூட்டரிலும் அதே போன்ற செயலே நடைபெறுகிது. ஆனால் கம்ப்யூட்டர் வேகமாக இயங்குவதால் அனைத்து செயல்களும் ஒரே நேரத்தில் நடைபெறுவது போலத் தோற்றமளிக்கிறது.இவை Single Core Processor பொருத்தப்பட்டுள்ள கம்ப்யூட்டரில் நடைபெறும் செயல்களாகும்.

ஆனால் தற்போது புதிதாக வந்திருக்கும் Dual Core processor களில் உண்மையிலேயே இரண்டு செயல்பாடுகள் ஒரேநேரத்தில் செயல்படுத்தப்படுகின்றன. ஏனெனில் Dual Core processor கள் ஒரே Chip க்குள் இரண்டு processor களைக் கொண்டுள்ளன. அதனால் ஒரே நேரத்தில் ஒன்றிற்கும் மேற்பட்ட செயல்களை செய்யும் திறனை கம்ப்யூட்டர் பெறுகிறது.Intel தயாரித்துள்ள புதியவகை processor களான Core 2 Duo வகைகள் ஒரே Chip க்குள் இரண்டு processor களைக் கொண்டிருந்தாலும் Dual Core processor களை விட வேகம் மிகுந்த மேம்படுத்தப்பட்டprocessor களாகும்.
Quad Core வகை processor கள் Chip க்குள் நான்கு processor களைக் கொண்டுள்ளன. எனவே இவ்வகை processor கள் Single Core Processor களை விட நான்கு மடங்கு வேகமாகச் செயல்படும்.
மனித மூளையானது Single Core Processor போன்று செயல்படுகின்றன. அதாவது ஒரு மனிதனால் ஒரு நேரத்தில ஒரு செயலை மட்டுமே சிறப்பாக செய்ய முடியும் என ஆராய்ச்சியில் கண்டறியப்பட்டுள்ளது.

சுமார் 1.5 கிலோ கிராம் எடையும், சுமார் 149000 கிலோமீட்டர் முதல் 176000 கிலோ மீட்டர் நீளம் வரையிலான நரம்பிழைகளைக்கொண்ட மனித மூளையின் பெருமூளை(cerebral) மற்றும் சிறுமூளை(cerebellum) ஆகிய அத்தனை சமாச்சாரங்களும் வெறும் 12 Watts சக்தியில் இயங்குவதால் ஒரே நேரத்தில் பல வேலைகளை சிறப்பாக செய்யமுடியாது என்பதே ஆராய்ச்சியாளர்களின் முடிவு.

உதாரணமாக போக்குவரத்து நெருக்கடி மிகுந்த சாலையில் வாகனம் ஓட்டும் நபர் ஒரே நேரத்தில் வலப்புறமாக தன்னைக் கடந்து செல்லும் வாகனங்களின் எண்ணிக்கையையும், இடப்புறமாக தான் கடந்து செல்லும் வாகனங்களின் எண்ணிக்கையையும் மிகச்சரியாக கூறமுடியாது. ஏனெனில் அவர் தனது கவனம் முழுவதையும் தனது வாகனத்தைச் செலுத்துவதிலேயே செலவழிக்கிறார்.

மொபைல் போனில் பேசிக்கொண்டே வாகனத்தை ஓட்டும்போது நமக்கு கவனச்சிதறல் ஏற்படுகிறது. அதனால் அந்நேரத்தில் கண்ணில் எதிர்ப்படும் வாகனங்கள் பற்றிய அறிவோ காதை வந்தடையும் வாகனங்களின் ஒலி பற்றிய விழிப்புணர்வோ மூளையைச் சென்றடைவதில்லை. அதனாலேயே பல விபத்துகள் ஏற்படுகின்றன.

எனவே..

நமது மூளையானது Multi Tasking திறமை கொண்டது அல்ல என்பதை உணர்ந்து...

வாழ்க்கையில்..
சாலையில் பயணிக்கையில்..
உன் கையில் செல்...
தவிர்த்து விட்டுச் செல்!

......

பலன் தரும் பாட்டி வைத்தியம் -2

2011-10-20T14:31:00.002+05:30

50 கிராம் வெள்ளைப்பூண்டு மற்றும் இஞ்சி 50 கிராம் எடுத்து விழுதாக அரைத்துக்கொள்ளவும். அத்துடன் பெரிய வெங்காயம் 25 கிராம், சிறிய வெங்காயம் 10 கிராம் சேர்த்து மிக்சியில் மாவுபோல அரைத்து ஒரு கிண்ணத்தில் எடுத்துக் கொள்ளவும். அத்துடன் சிறிது நாட்டுச் சர்க்கரையைச் சேர்த்து வாயில் போட்டு சிறிது நேரம் குதப்பிவிட்டு அப்படியே முழுங்கிவிடவும்.அத்துடன் சிறிது வேப்பெண்ணையை உள்ளங்கையில் ஊற்றி தலைமுடி மற்றும் கை,கால்களில் தடவிக்கொண்டு சென்றால்....

எவ்வளவு கூட்டத்திலும் நீங்கள் நசுங்காமல் தாராளமாக பயணம் செய்யலாம்.

.....

பலன் தரும் பாட்டி வைத்தியம் - 1

2011-10-20T14:03:00.003+05:30

100 மில்லி லிட்டர் வேப்பெண்ணெயை வாணலியில் இட்டு சூடுபடுத்தி,கொதிநிலைக்கு வந்தவுடன் அத்துடன் 50 மில்லி லிட்டர் நல்லெண்ணெய் மற்றும் ஒரு தேக்கரண்டி கடுகு எண்ணெய் சேர்த்து சுமார் 15 நிமிடங்கள் சூடுபடுத்தி அத்துடன் சிறிது பெருங்காயப் பவுடர் லேசாக தூவி வாணலியை இறக்கி வைத்து ஆற வைக்கவும்.இரவு உறங்குவதற்கு முன் வாணலியிலிருந்து இந்த கலவையை எடுத்து உடல் முழுவதும் பூசிக்கொண்டால்..........

கொசு கடிக்காதுங்க!

.....

தே.மு.தே.பி

2011-06-05T16:53:00.015+05:30

பின் குறிப்பு :

தே.மு -தேர்தலுக்கு முன்.

தே.பி - தேர்தலுக்குப் பின்.

.....

2G சுட்டதடா!

2011-05-18T16:04:00.011+05:30

2G சுட்டதடா கை விட்டதடா!
2G சுட்டதடா கை விட்டதடா!

ஆய்வு கெட்டதடா ஓய்வு கிட்டுதடா!
ஆய்வு கெட்டதடா ஓய்வு கிட்டுதடா!

தேர்தல் முடிவு வந்த பின்னால்
திரு திருன்னு முழிக்குதடா!

(2G சுட்டதடா...)

ஆரவாரப்பேய்கள் 58 ம் ஓடி விட்டதடா!
5 மட்டும் மீண்டு வந்து மிரண்டு நிக்குதடா!

மாங்கனிகள் 27 ம் மட்கிப் போனதடா
3 மட்டும் கனிந்து வந்து முக்கி நிக்குதடா!

சிறுத்தை 10 ம் சீற்றத்துடன் கலைந்து போனதடா!
தேர்தல் காட்டில் அத்தனையும் தொலைந்து போனதடா!

கொள்ளுப் பேரன் பேத்தியெல்லாம் கோபம் கொள்ளுதடா!
பதவியின்றி அத்தனையும் பதறி நிக்குதடா!

மஞ்சள் துண்டு வெளுத்துப் போயி வெள்ளை வந்ததடா!
காங்கிரசால் கனிமொழிக்கு தொல்லை வந்ததடா!

போயஸ் கோட்டம் கனவில் வந்தால் பொறி கலங்குதடா!
விஜயகாந்து தம்பியை நினைச்சு விழி கலங்குதடா!

கடிதம் எழுதிய எந்தன் கைகள் ஓய்வு கொண்டதடா!
மனம் 2G 2G 2G என்று கடுப்பு கொள்ளுதடா!

.....

தத்து(பித்து)வம்!

2011-04-29T16:00:00.002+05:30

அருகில் தூங்குபவர் விடும் குறட்டையிலிருந்து தப்பிக்க உங்கள் காதுகளைப் பொத்திக்கொள்வதற்கு உங்களுக்கு உரிமை உண்டு. ஆனால் குறட்டை விடுபவர் வாயையும் மூக்கையும் நீங்கள் பொத்தினால் கொலை வழக்கில் சிறையிலிருந்து ஜாமினில் வெளிவரக்கூட உங்களுக்கு உரிமையில்லை.

2ஜி..சோனியாஜி...கருணாஜி..கனிமொழிஜி...அடச்சீ!

2011-04-26T13:16:00.002+05:30

தங்கபாலுவின் காமெடி கலக்கல்!

2011-04-19T11:18:00.005+05:30

யூத்ஃபுல் விகடனில் உங்கள் படைப்புகள்..!

2011-04-18T14:17:00.002+05:30

ஹாய் யூத்ஸ்..!

இணையத்தின் சகல இடுக்குகளிலும் இளமை நிரம்பி வழிகின்ற காலமிது. உலகத் தமிழர்களின் முகவரியாக ஜொலிக்கிற விகடன் அமைத்துத் தந்திருக்கும் மேடைதான் இந்த 'யூத்ஃபுல் விகடன்' பல்கலைத் தளம். இது ஓர் இலவச தளம். உங்கள் படைப்புத் திறமைக்கான களம்.

வார வலையிதழான யூத்ஃபுல் விகடன் ஒவ்வொரு செவ்வாய்க்கிழமையும் புதுப்பிக்கப்படும்.

இதில் நீங்கள் எதைப் பற்றியும் எழுதலாம். எந்த எல்லையும் இல்லை. கதை, கவிதை, கட்டுரை, விமர்சனம் என இலக்கியப் படைப்புகளில் சடுகுடு ஆடலாம். உள்ளூர் சினிமா முதல் உலக சினிமா வரை மலிந்து கிடக்கும் உன்னத படைப்புகளையும் அலசலாம்.

கல்வி, வேலைவாய்ப்புகள் சார்ந்த தகவல்களை அனுப்பலாம். உங்கள் பணி, தொழில், துறை சார்ந்த அனுபவத்தை பிறர் பயனுறும்படி கட்டுரைகள் தரலாம். உங்கள் பார்வையில் சமூக அக்கறை சார்ந்த கட்டுரைகளையோ ஆக்கங்களையோ அனுப்பலாம்.

படைப்புகளை அனுப்ப விரும்புவோர் கவனத்தில் கொள்ள வேண்டியவை...

* யூத்ஃபுல் விகடன் தளத்துக்கு படைப்புகளை youthful@vikatan.com என்ற மின்னஞ்சல் முகவரிக்கு Wordpad அல்லது Notepad மூலம் இணைத்து அனுப்பலாம்.

* புதிய படைப்புகளுக்கே முக்கியத்துவமும் முன்னுரிமையும் அளிக்கப்படும். அனுப்பப்படும் படைப்புகள் இதுவரை இணையத்தில் வெளியாகாமல் இருக்க வேண்டும் என்பதை கவனத்தில் கொள்க.

* இளைய சமுதாயத்துக்கு பயன் தரக்கூடிய படைப்புகளுக்கு முக்கியத்துவம் அளிக்கப்பட்டு www.vikatan.com முகப்பு பக்கத்தில் இணைக்கப்படும்.

* படைப்பாளிகள் தங்களது படைப்புகளுடன் புகைப்படத்தையும் இணைத்து அனுப்பலாம். (ஒருமுறை மட்டும் அனுப்பினால் போதுமானது)

* இளம் படைப்பாளிகள் மட்டுமின்றி, இளைய சமுதயாத்துக்காக எந்த வயதினரும் படைப்புகளையும் கட்டுரைகளையும் எழுதி அனுப்பலாம்.

* படைப்புகளை அனுப்புவோர் தங்களது பெயர், வயது, கல்வி, முகவரி, செல்பேசி எண்கள் முதலியன அடங்கிய சிறு சுய விவர குறிப்பை இணைக்க வேண்டியது அவசியம். (ஒரு முறை மட்டுமே அனுப்பினால் போதுமானது)

* புகைப்பட தொகுப்புகளை வெளியிட விரும்புவோர் மின்னஞ்சலில் இணைத்தோ அல்லது அஞ்சல் மூலமோ அனுப்பலாம்.

* குறும்படம், ஆவணப்படம், அனிமேஷன் ஆக்கங்களை சி.டி அல்லது டி.வி.டி. வடிவில் "யூத்ஃபுல் விகடன், விகடன் டாட் காம், 757, அண்ணா சாலை, சென்னை - 600002" என்ற அஞ்சல் முகவரிக்கு அனுப்பி வைக்கலாம்.

* யூத்ஃபுல் விகடனில் வெளியாகும் படைப்புகளின் உரிமை முழுதும் அந்தந்த படைப்பாளிகளுக்கே உரியது.

* படைப்பு வெளியானவுடன், அதுபற்றி விவரம் மின்னஞ்சல் மூலம் ஓரிரு நாட்களுக்குள் தெரிவிக்கப்படும்.

....

போடுங்கய்யா ஓட்டு!

2011-04-05T13:36:00.012+05:30

தேர்தலைத் திருவிழா ன்னு சொல்லுவாங்க.

ஆனா அந்த திருவிழாவில் வெட்டப்படும் பலியாடுகள் யாருன்னா நம்ம அப்பாவி வாக்காளன்தாங்க.

தேர்தலிலே நிற்கிற வேட்பாளர் கஞ்சக் கருமிப் பயலா இருந்தாலும் தேர்தல் நேரத்தில மட்டும் கொடை வள்ளலா மாறிடுவாரு.

நேத்து வரைக்கும் நடுரோட்டுல வாந்திபேதி எடுத்து வயித்தால போயி மயங்கி கிடந்த வக்கத்துப் போன வாக்காளனை கண்டுகொள்ளாமல் போன நம்ம கட்சி வேட்பாளரு இப்ப வேலை வெட்டிக்கு போகாம வீட்டுக்குள்ள ஒரு ரூவா அரிசியை பொங்கி தின்னுபுட்டு ஒய்யாரமா குந்திகிடக்கிற அவனை போயி சுகம் விசாரிச்சு சுக்குகாபி போட்டு கொடுப்பாரு.

வாக்கு சேகரிக்கும் வேட்பாளர் ஒரு மாத காலத்துக்கு ரெண்டு கைகளையும் பெவிகால் போட்டு ஒட்டுனது மாதிரி கும்பிட்டுகிட்டே திரிவாரு. குடும்பத்தோட தூங்கும்போது கூட கும்பிட்டுகிட்டே குறட்டைவிடுவாரு.

தேர்தல் நேரத்தில கட்சிக்காரனுங்க கொடுக்கும் வாக்குறுதிகளைக் கேட்டாலே தலையைச்சுத்துது.

'நாங்கள் ஆடசிக்கு வந்தால் அரசாங்க செலவில் எல்லா ஊர்களிலும் அன்ன சத்திரம் கட்டி அனைத்து குடும்பங்களையும் தங்கவைத்து மூன்று வேளையும் ஓசியில் உணவு வழங்குவோம்.

காலை எழுந்தவுடன் கடுங்காபியுடன் காரமும் வழங்கப்படும்.

காலை சிற்றுண்டியாக குண்டான் நிறைய குழம்பு சோறும் குஷ்பு இட்லியும் வழங்கப்படும்.

மதிய உணவாக மாங்காய் வடவத்துடன் மணமணக்கும் சாம்பார் சாதமும்,

மாலையில் மக்காச்சோளமும் அவித்துக்கொடுக்கப்படும்.

அத்துடன் பிரமாதமான பில்டர் காபி வரிசையில் நிற்க வைத்து வாயில் ஊற்றப்படும்.

இரவு உணவாக இருட்டுக்கடை அல்வாவும் இடியாப்பமும் வழங்கப்படும்.

ஓசியில் தின்னு விட்டு ஒய்யாரமாக ஓய்வெடுப்பதற்கு ஓலைப்பாய் பின்னித்தரப்படும்.

டாஸ்மாக்கில் தண்ணியடித்துவிட்டு வாந்தியெடுத்து, வயலில் உருண்டு கிடப்பவர்களுக்கு 'சிறந்த குடிமகன்' விருதாக கோப்பையுடன் கோழி சப்பையும் குவார்ட்டரும் வழங்கப்படும்.

போதையில் பொண்டாட்டியை புரட்டியெடுப்பவர்களுக்கு 'உத்தமபுருசன்' பட்டத்துடன் ஊறுகாயும் வழங்கப்படும்.

வருடத்தில் அதிகமாக வாங்கி குடித்து, அரசுக்கு வருமானத்தை பெருக்கித் தரும் பொறுக்கிப்பயல்களுக்கு வாரி வழங்கும் வள்ளல் பட்டம் வழங்கப்படும்.

குடிபழக்கம் இல்லாத தேசதுரோகிகள் குண்டர் சட்டத்தில் சிறையில் அடைக்கப்படுவார்கள்.

திருடர்கள் தொழில் மேம்பாட்டுத் திட்டத்தின் கீழ், ஒரு நாளைக்கு 24 மணி நேரத்திற்கு மட்டும் மின்சாரம் நிறுத்தப்படும். இத்திட்டத்தின் கீழ் திருடர்களுக்கு ஆண்டொன்றுக்கு 420 இலட்சம் கோடி ரூபாய் வருமானம் கிடைக்கும்.

பிச்சைக்காரர்களுக்கு அரசு மானியத்துடன் தங்கத்தில் திருவோடு வழங்கப்படும்.

வேலையற்ற இளைஞர்கள் வெட்டிப்பேச்சு பேசி காலைத்தைப் போக்க குட்டிச்சுவர்கள் கட்டிக்கொடுக்கப்படும்.

கச்சத்தீவை கயிறுகட்டி இழுத்துவந்து இந்தியாவோடு இணைக்க முயற்சிகள் மேற்கொள்ளப்படும்.'

இப்படியெல்லாம் வாகனத்தில் நின்றபடி வாக்குறுதி கொடுத்து வாக்கு கேட்கும் வேட்பாளரை நம்ம மக்கள் வாயைப்பொளந்து கேட்பாங்க.

அதே ஆச்சரியத்தோட போயி பட்டனைக் குத்தி அவனுக்கு பதவியை கொடுத்துபுட்டு பாழாய்ப்போயிடுவாங்க.

நேத்துவரைக்கும் மணல்கொள்ளையடிச்சு,சாராயம் வித்து போலீஸ்காரன் கிட்ட செறுப்படி வாங்கின,மூணாம் கிளாஸ் பெயிலான நம்ம வேட்பாளர் தேர்தல் நேரத்திலே கஞ்சி போட்ட வெள்ளைச்சட்டையும் வேட்டியும் கட்டிகிட்டு மைக்கைப் பிடிச்சு பொளந்து கட்டுவாரு.

'நான் என்ன சொல்ல வருகிறேன் என்றால்.... அதாவது இதன் மூலம் உங்களுக்கெல்லாம் ஒன்று கூறிக்கொள்ள நான் விரும்புவது என்னவென்றால்... இதைப்பற்றி திருவள்ளுவர் என்ன சொன்னார் என்றால்.. அதாவது இதை நான் ஏன் உங்களுக்கெல்லாம் கூறுகிறேன் என்றால்... ஆயிரத்தி தொள்ளாயிரத்தி எழுபத்தி ரெண்டிலே... சுமார் ரெண்டாயிரம் வருடங்களுக்கு முன்னால் என்ன நடந்தது என்றால்.... இதைப்பற்றியெல்லாம் உங்களுக்கு நான் ஒன்றும் சொல்லத்தேவையில்லை. ஏனென்றால் நான் கூறி நீங்கள் தெரிந்துகொள்ளும் அளவிற்கு நீங்கள் எல்லாம் முட்டாள்கள் இல்லை என்பதாலும் அனைத்தும் உங்களுக்கு தெரியும் என்பதாலும் மேற்கொண்டு அதைப்பற்றி உங்களுக்கு நான் கூறவேண்டிய தேவையில்லை என்பதால் இத்துடன் எனது உரையை முடித்துக்கொள்ள விரும்புகிறேன்.'

கடைசி வரைக்கும் என்னத்தை சொல்ல வந்தார்னு அவருக்கும் தெரியாது. கேட்டவனுக்கும் புரியாது.

தேர்தல் நாள் அன்னைக்கு கட்சிக்காரனுங்க ரொம்ப பாசத்தைப் பொழிவானுங்க.

குத்தவெச்சி உட்கார்ந்து வெத்தலையை குதப்பிகிட்டு கிட்டு இருக்கிற கிழவிகளை குண்டுகட்டா தூக்கிகிட்டு போற நம்ம கட்சிக்கார பயலுங்க, எலக்சன் பூத்துக்குள்ள கொண்டுபோயி கிழவி கையைப்பிடிச்சி 'இந்த பட்டன்ல குத்து ஆத்தா' ன்னு சொல்லி இவனுங்களே பட்டனை குத்திபுட்டு கிழவியை வெளியில தூக்கி கடாசிட்டு போயிடுவானுங்க.

சுள்ளுன்னு அடிக்கிற வெயிலிலே வீட்டுக்கு திரும்பி வரும் கிழவிகள் சுருண்டு விழுந்து சுடுகாட்டுக்கு கொண்டுபோற நிலைமைக்கு ஆளாயிடுவாங்க.

தேர்தல் முடிவு அறிவிக்கபட்டதும் வெற்றிபெற்ற கட்சிக்காரனுங்க வெடியை வெடிச்சு எதிர்க்கட்சிக்காரனோட வேதனையைக் கிளப்புவானுங்க.

தோற்றுப்போன கட்சிக்காரனுங்க தோளில் கிடக்கிற துண்டை எடுத்து தலைமேல போட்டுகிட்டு அடையாளம் தெரியாம ஊருக்குள்ள நடமாடுவானுங்க.

தேர்தலிலே தோற்றுப்போன கட்சிக்கு ஆதரவா பிரச்சாரம் பண்ணின நடிகர்கள் பீதியில் பேதிபோயி நாதியத்துப் போயிடுவானுங்க.

யாரு வெற்றி பெற்றாலும் தோற்றுப் போனாலும் பட்டனைக் குத்தின பாவிமக்கள் தன்னோட பழைய சைக்கிளுக்கு பஞ்சர் ஒட்ட காசில்லாம பஞ்சத்துல அடிபட்ட பரதேசி ஆயிடுவாங்க.

இதன் மூலம் உங்களுக்கெல்லாம் நான் தெரிவித்துக்கொள்ள விரும்புவது என்னவென்றால்..

தயவுசெய்து தேர்தலிலே ஓட்டுப்போடுங்க...!

'போடுங்கய்யா ஓட்டு! எந்த கண்றாவி சின்னத்தையாவது பார்த்து!'

என்று கூறி இத்துடன் எனது உரையை முடித்துக்கொள்கிறேன்.

நன்றி! வணக்கம்!

.......

தேர்தல் (மறை)முகம்-4

2011-03-19T15:59:00.004+05:30

வல்லரசு சூழலில்
ஒளிரும்
ஒளிநாடா?

இல்லை..

வானளாவிய ஊழலில்
ஒழியும்
ஒழிநாடா?

என

இழிவாய்
இகழ வைத்தது...

நீரா ராடியாவின்
ஒலிநாடா!

...

தேர்தல் முகம்-3

2011-03-19T15:43:00.002+05:30

தேர்தலில்..

வெற்றி பெற்றால்
அரசு செலவில்..
ஆகாய வழியில்..
அலைந்து திரிய..
தமிழ்நாடு!

அவமானமாய்
தோற்றுப்போனால்
அடுத்த தேர்தல்
வரும் வரை
அயர்ந்து தூங்க..
கொடநாடு!

...

தேர்தல் முகம்-2

2011-03-19T15:30:00.002+05:30

அரசனும்
ஆண்டியாவான்
விலைஉயர்வு
சூழலிலே!

ஆண்டி மகன்
அரசனான்
இமாலய
ஊழலிலே!

....

தேர்தல் முகம்-1

2011-03-19T15:13:00.004+05:30

சூத்திரத்தை...
சாத்திரத்தை
ஆத்திரமாய் எதிர்த்த
ஆவேசப் பகுத்தறிவு..
மஞ்சள் துண்டு
துவைத்துப் போட
கோபாலபுரம் விரைவு!

...

எழுப்புவோரை மிதிப்போம்!

2010-11-10T15:46:00.011+05:30

சோம்பேறிகளைப் பத்தி ஒரு கதை எழுதணும்னு ரொம்பநாளா நெனைச்சிகிட்டு இருந்தேன். ரொம்ப அலுப்பா இருந்ததால எழுத முடியலை.

அந்தக்காலத்திலே சோம்பேறிகளுக்கு ரொம்ப மரியாதை கொடுத்திருக்காங்க.அதனாலதான் எல்லார் வீட்டிலேயும் சோம்பேறிகள் படுத்து உருள சொகுசான திண்ணை கட்டி வெச்சியிருக்காங்க.

வசதிபடைச்ச இன்னும் சிலபேர் சோம்பேறிகள் ஓய்வெடுப்பதற்காக தங்களோட சொந்த செலவிலேயே சத்திரம் கட்டிவெச்சி தரித்திரத்தில்... மன்னிக்கவும் சரித்திரத்தில் இடம்பிடிச்சிருக்காங்க.

ஒரு ஊர்ல லேசி கான் ன்னு ஒருத்தன் இருந்தானாம். அவன் ஊர்ல இருக்கிற சோம்பேறிகள் எல்லோரையும் சேர்த்து 'ஓய்வு எடுப்போர் நலச்சங்கம்' னு ஒரு சங்கம் ஆரம்பிச்சான்.

சங்கத்து உறுப்பினர்கள் ஒவ்வொருவரும் ஒரு ரகம்.

கொட்டாவி விடக்கூட அலுப்பு படுவார்கள் சிலர்.

மூக்கின்மேல் உட்கார்ந்திருக்கும் ஈயை விரட்ட ஆள்தேடுவார்கள் சிலர்.

கழன்று விழும் பேண்டை கையால் பிடிப்பதற்கு உதவி தேடுவார்கள் சிலர்.

கனிந்த வாழைப்பழத்தை கடித்துத் தின்ன அலுப்புபட்டு ஜுஸ் போட்டு குடிப்பவர்கள் சிலர்.

மாதாமாதம் சங்க கட்டிடத்துல கூட்டம் நடத்தினான். ஆனா அலுப்பா இருக்குதுன்னு சொல்லிட்டு சங்க உறுப்பினர்கள் யாருமே கூட்டத்துக்கு வர்றது இல்லை.

தூக்கக் கலக்கத்துடன் வந்திருந்த ஒருசிலரும் வந்தவுடனே கக்கத்தில் சுருட்டி வெச்சிருந்த பாயை விரிச்சிப்போட்டு ஆளுக்கொரு மூலையிலே அயர்ந்து தூங்க ஆரம்பிச்சிட்டாங்க.

சங்கக்கூட்டத்தில் பின்வரும் தீர்மானங்கள் நிறைவேற்றப்பட்டன:

1.சங்கத்தின் கொள்கைகளுக்கு விரோதமான அஞ்சால் அலுப்பு மருந்தை உடனே தடை செய்ய வேண்டும்.

2.மருத்துவமனைகளில் குளுகோஸ் பயன்படுத்தி நோயாளிகளை சுறுசுறுப்பாக்குவதை உடனே நிறுத்தவேண்டும்.

3.நிம்மதியாக குறட்டைவிட்டு தூங்க விடாமல் தடை ஏற்படுத்தும் மின்தடையை வண்மையாகக் கண்டிக்கிறோம்.

4.சோம்பல் காரணமாக சாலையோரத்திலும் பூங்காவிலும் சுருண்டு தூங்குபவர்களை மயக்கத்தில் விழுந்ததாக நினைத்து சோடாவை மூஞ்சியில் பீய்ச்சியடித்து எழுப்பி தொந்தரவு செய்பவரை உடனே குண்டர் சட்டத்தில் கைது செய்யவேண்டும்.

5.அதிகாலையில் பெல் அடித்து தூக்கத்தை கலைக்கும் பால்காரர்கள் மற்றும் பேப்பர் போடுபவர்களின் வாகனங்களை உடனே பறிமுதல் செய்யவேண்டும்.

6. தூக்க மாத்திரை உற்பத்தியை அதிகரித்து சங்க உறுப்பினர்களுக்கு இலவசமாக ரேசன் கடைகளில் விநியோகிக்க வேண்டும்.

7. குறட்டை சத்தத்தினை தேசிய கீதமாக அறிவிக்கவேண்டும்.

8. அரசாங்கமானது, சிறந்த சோம்பேறிகளைத் தேர்ந்தெடுத்து அவர்களுக்கு ஓய்வூதியம் வழங்கவேண்டும். அதையும் அவர்களை வெயிலில் அலையவிடாமல் அவர்களது வீட்டிற்கே நேரடியாகச்சென்று வழங்கவேண்டும்.

9. அதிகாலை நேரம் 5 என்பதை மாற்றி 11 மணியாக அறிவிக்க வேண்டும்.

10. அதிகாலையில் கூவும் சேவல்களுக்கு மரணதண்டனை வழங்கி, பின்னர் அவற்றை வறுத்து, கடிப்பதற்கு எளிமையாக இருக்கும் லெக் பீஸ் மட்டும் சங்கத்து உறுப்பினர்களுக்கு வழங்குமாறும், அதையும் சம்பளத்திற்கு ஆள் வைத்து ஊட்டி விடுமாறும் கேட்டுக்கொள்கிறோம்.

ஒருநாள், சங்கத்தலைவர் லேசி கான் , லேசி ராமன் என்கிற தொண்டனை கூப்பிட்டு தனது கன்னத்தின் மேலே உட்கார்ந்து கடித்துக்கொண்டிருக்கும் கொசுவை விரட்ட உத்தரவிட்டான்.

அதற்கு அந்த தொண்டன் 'கொசுவை அப்புறமா விரட்டிக்கலாம். முதல்ல என் காலை நக்குற நாயை தயவு செய்து விரட்டிவிடுங்க தலைவரே' ன்னு கெஞ்சினான்.

மிரண்டு போன சங்கத்தலைவர், தொண்டன் தன்னை மிஞ்சிய சோம்பேறியாய் இருப்பதைக்கண்டு வியந்து 'நீதாண்டா இனிமேல் இந்த சங்கத்துக்கு தலைவர்'ன்னு சொல்லி தன்னோட பதவியை ராஜினாமா செய்தான்.

உடனே அந்த தொண்டன் 'எனக்கு அந்தபதவி வேண்டாம் தலைவரே' என்று பணிவுடன் சொன்னான்.

'எண்டா அப்படி சொல்லுற?' என்று கேட்டார்.

'அதுவந்து தலைவரே! இப்ப நான் தலைவர் ஆயிட்டா இப்ப நான் எழுந்திருச்சி வந்து உங்க இருக்கையில அமரணும். எனக்கு ரொம்ப அலுப்பா இருக்குது. மன்னிச்சுக்கங்க'

அதிர்ச்சியடைந்த சங்கத்தலைவர் ஆனந்தக்கண்ணீர் மல்க, கீழே குந்தியிருந்த அந்த தொண்டனை கட்டியணைத்து பாராட்டிவிட்டு குண்டுகட்டாக அவனை தூக்கி தலைவர் இருக்கையில் அமரவைத்துவிட்டு தான் தரையில் அமர்ந்துகொண்டார்.

புதிய சங்கத்தலைவர் லேசி ராமன் தலைமையில் சங்கம் மேலும் சிறப்பாக வளர்ச்சியடைந்து சங்கக்கட்டடம் ஆழ்ந்த தூக்கக்கலக்கத்துடன் அமைதியானது.

வில் துளைக்கும் அம்புகள் -3

2010-03-02T10:48:00.005+05:30

பகுதி -1

பகுதி -2

பகுதி -3

இரண்டு நாட்கள் கழித்து.....

காய்கறி மார்க்கெட்டில் காய்கறி வாங்கிக்கொண்டிருந்தார் ரமணன்.

செல்போன் அழைத்தது.

'ரமணன். நான் மார்ட்டின் பேசறேன். உங்க கிட்ட முக்கியமான விசயம் பேசணும்.'

'சொல்லுங்க சார்.'

'ராஜா இறந்துட்டதா இன்ஸ்பெக்டர் பிரேம்நாத் எனக்கு போன் பண்ணி சொன்னார். அடுத்த நிமிசம் இன்னொரு போன் வந்தது. என்னைக் கொல்லப்போறதா ஒருத்தன் பேசறான். குரல் அப்படியே ராஜாவோடது மாதிரியே இருந்தது. எனக்கு ஒரே குழப்பமா இருக்கு. நீ கிளம்பி இங்க நேரா வா.'

சற்று யோசித்த ரமணன்,

'சார். நான் இன்னைக்கு ராத்திரி 11 மணிக்குமேல உங்க வீட்டுக்கு வர்றேன். நீங்க மட்டும் தனியா இருங்க. நான் வர்ற விசயம் யாருக்கும் தெரியக்கூடாது. என் கிட்ட ஒரு திட்டம் இருக்கு'

'என்ன திட்டம் தம்பி?'

'அதை நான் நேர்ல வந்து சொல்றேன்.'

.........

இரவு 11 மணி.

நீலாங்கரை மார்ட்டின் பங்களா.

'என்ன தம்பி? வந்து ரொம்ப நேரமாச்சு. எதையோ யோசிச்சி கிட்டு இருக்கீங்க?'

'சார் மேலிடத்திலே பேசி என்னோட சஸ்பெண்ட் உத்தரவை ரத்து பண்ணி திரும்பவும் என்னை வேலையில அமர வெச்சதுக்கு நன்றி சார்.'

'இப்ப இருக்கிற சூழ்நிலையில நீ இந்த கேஸை கையாள்றதுதான் எனக்கு பாதுகாப்பு. அதனாலதான் உனக்காக பேசி வேலையில அமர வெச்சேன்.'

'சார். உங்ககிட்ட ஒரு முக்கியமான கேள்வி.'

'கேளுங்க தம்பி'

'எதுக்கு சார் பாபுவை கொலை பண்ணுனீங்க?'

அதிர்ச்சியுடன் எழுந்தார் மார்ட்டின்.

'என்ன தம்பி உன்னோட போலிஸ் புத்தியை என்கிட்டேயே காட்டறியா?'

'ஒரு நிமிசம் அமைதியா உட்காருங்க சார். உங்களை எல்லாப்பிரச்சினையிலேயிருந்தும் விடுவிக்கத்தான் நான் இப்ப வந்தேன். நீங்க எந்த விசயத்தையும் மறைக்காம சொன்னாத்தான் நான் உங்களை காப்பாத்த முடியும்.'

'நான் எதுக்கு கொலை பண்ணனும் என்னோட நண்பனை?'

'சார்! பாபு கடைசியா உங்களுக்குத்தான் போன் பண்ணியிருக்கார். அதுக்கப்புறம் இரண்டு மணி நேரம் மட்டுமே அவரோட சிம் கார்டு வேலை செய்திருக்கு.'

'அதனால நான்தான் அவனை கொலை செய்தேன்னு எப்படி சொல்லலாம்?'

'சார். அதை வெச்சு மட்டும் சொல்லவில்லை. ஒரு நிமிசம் என்னோட வாங்க.'

இருவரும் வெளியே வந்தனர்.

வெளியே வராண்டாவில் நின்றிருந்த மார்ட்டின் காரின் டிக்கியின் கதவை திறந்தார் ரமணன்.

'இதோ பாருங்க. உங்க காரோட டிக்கியில அந்த கம்பியில ஒரு பிசிறு துணி தொங்குதே. அந்த துணி பாபு கடைசியா போட்டிருந்த சட்டையில் கம்பி மாட்டி கிழிஞ்ச துணி. நான் உங்க வீட்டுக்குள்ளே வர்றப்ப ஒரு சந்தேகத்துக்காக இந்த காரோட டிக்கியை தூக்கிப் பார்த்தப்ப இந்த விசயம் தெரிஞ்சது. சரி வாங்க உள்ளே போய் உட்கார்ந்து பேசலாம்.'

உள்ளே சென்றதும் அமைதியாக சோபாவின் மீது அமர்ந்தார் மார்ட்டின்.

'மார்ட்டின் சார். உங்களை ஜெயில்ல தள்றதுக்காக இதை நான் உங்க கிட்ட சொல்லலை. நீங்கதான் கொலை பண்ணியிருக்கீங்கன்னு தெரியும். ஆனா எப்படின்னு தெரிஞ்சாத்தான் நான் உங்களை காப்பாத்த முடியும். தயவு செய்து எதையும் மறைக்காம என் கிட்ட சொல்லுங்க.'

மேஜை மீதிருந்த தண்ணீர் டம்ளர் வாயில் கவிழ்த்துவிட்டு பேச ஆரம்பித்தார் மார்ட்டின்.

'ஆமாம். ரமணன். நான் உங்க கிட்ட இப்ப சொல்லப்போற விசயத்தை வேற யார்கிட்டேயும் சொல்லிடாதீங்க. நீங்க என்னை இந்த சிக்கலில் இருந்து காப்பாத்துவீங்கன்னு நம்பித்தான் இதை சொல்றேன்.

நீங்க பாபுவை பெசன்ட் நகர் பீச்ல சந்திச்சு கொஞ்சம் நேரம் கழிச்சு பாபு எனக்கு போன் பண்ணினான். சொத்துக்காக என்னையும் பாபுவையும் கொல்றதுக்கு மூர்த்தி திட்டம் போட்டிருந்த தகவலை நீங்க சொன்னதா சொன்னான். அவன் பேசி முடிச்ச அப்புறம் கொஞ்சம் நேரத்திலே நான் இருந்த இந்த நீலாங்கரை பங்களாவுக்குள்ள என்னை கொலை பண்றதுக்காக ராஜா வந்துட்டான்.'

'என்ன சார் சொல்றீங்க? ராஜா இங்க வந்தானா?'

'ஆமாம் ரமணன். அவன் கத்தியோட என்னை நோக்கிப் பாய்ஞ்சப்ப நான் காவலுக்காக நிறுத்தி வெச்சிருந்த என்னோட ஆட்கள் அவனைப் பிடிச்சு அமுக்கிட்டாங்க. அப்புறம் அவனை கழுத்தை நெறிச்சு கொலை பண்ணினேன். அவனோட உடலை எங்க பசங்க காரில எடுத்துகிட்டு போய் தாம்பரத்திலே வீசிட்டு வந்துட்டானுங்க.'

'சார்! அப்ப ராஜாவை கொலை பண்ணினதும் நீங்கதானா?'

'ஆமாம். கொலை பண்ணி முடிச்ச கையோட எனக்கு ஒரு யோசனை வந்துச்சு. சொத்துக்காக பார்ட்னர்களை கொலை பண்ண மூர்த்தி போட்ட திட்டத்தை நாமே செய்தா என்னன்னு யோசிச்சுப் பார்த்தேன். மூர்த்தி ஏற்கனவே செத்துட்டான். அதனால மீதி இருக்கிற பாபுவையும் தீர்த்துக் கட்டிட்டு அவனை ராஜா கொலை பண்ணினதா செட்டப் பண்ணிடலாம்னு திட்டம் போட்டேன். ராஜா இறந்து போன விசயத்தை பாபு கிட்டே சொல்லாம அவனுக்கு போன் பண்ணி இங்கே வரவழைச்சேன். அவனை இங்கேயே துப்பாக்கியால சுட்டு சாகடிச்சேன். அப்புறம் நம்ம பசங்க அவனோட உடம்புல கல்லைக் கட்டி மெரினா கடல் பக்கமா படகுல கொண்டுபோய் கடல்ல தூக்கி வீசிட்டாங்க. ஆனா கயிறு எப்படியோ அவிழ்த்து கிட்டு பிரேதம் கரை ஒதுங்கிடுச்சு. ஆனா கொலை செய்யப்பட்ட நேரத்தை உடல் பரிசோதனையில கண்டுபிடிக்கலாம் என்கிற விசயத்தை நான் மறந்திட்டேன்.'

'நல்லவேளை நீங்க என்கிட்டே சொன்னீங்க. இந்த விசயத்தை வெளியில் தெரியாம அமுக்கிட வேண்டியது என்னோட பொறுப்பு.'

'அது சரி. போன்ல என்னை மிரட்டினவன் யாருன்னு தெரியலையே. அவனால எனக்கு திரும்பவும் ஆபத்து வருமோன்னு பயமா இருக்கு.'

'அவன் யாருன்னு கண்டுபிடிக்க ஒரு வாரம் அவகாசம் கொடுங்க. ஆனா அதுக்கு நீங்க ஒரு காரியம் செய்யணும்.'

'என்ன செய்யணும் தம்பி?'

'நீங்க தற்கொலை பண்ணிகிட்டதா ஒரு லெட்டர் எழுதி வெச்சுட்டு தலைமறைவாயிடுங்க. உங்களுக்கு போன் பண்ணி மிரட்டினவன் குழம்பிப்போய் அது நிஜமான்னு தெரிஞ்சிக்கிறக்கு முயற்சி பண்ணுவான். அதுக்குள்ள அவன் யார்னு கண்டுபிடிச்சு போட்டுத்தள்ளிறலாம்'

சற்று யோசித்த மார்ட்டின் ஒரு வெள்ளைத்தாளை எடுத்து எழுத ஆரம்பித்தார்.

'மார்ட்டினாகிய நான் வாழ்க்கையில் என்னுடைய அருமை நண்பர்களை இழந்த துக்கம் தாங்காமல் தற்கொலை செய்து கொள்கிறேன். எனது தற்கொலைக்கு நானே முழுமுதல் பொறுப்பு. - இப்படிக்கு , மார்ட்டின்.'

எழுதிய காகிதத்தை ரமணனிடம் நீட்டினார் மார்ட்டின்.

படித்துப்பார்த்த ரமணன், நிமிர்ந்து பார்த்து மார்ட்டினை நோக்கி புன்னகைத்தார்.

'அதான் லெட்டர் எழுதிட்டியே. அப்புறம் இன்னும் ஏன் சாகாம இருக்கே மார்ட்டின்.'

இடுப்பிலிருந்து உருவிய சைலன்சர் பொறுத்திய பிஸ்டலை எடுத்து கண்ணிமைக்கும் நேரத்தில் மார்ட்டினின் நெற்றிப்பொட்டில் சுட்டார் ரமணன்.

அதிர்ச்சியுடன் சடலமாக கீழே சாய்ந்தார் மார்ட்டின்.

மார்ட்டின் எழுதிய தற்கொலைக் கடிதத்தை அவரது உடல் அருகில் வீசிவிட்டு, பிஸ்டலை இறந்துபோன மார்ட்டினின் உள்ளங்கையில் திணித்துவிட்டு அங்கிருந்து வெளியேறினார் ரமணன்.

..................

கமிஷனர் அலுவலகம்.

கமிஷனர் சசிகுமார் முக்கிய கோப்புகளை புரட்டிப் பார்த்துக்கொண்டிருந்தார்.

'சார். நாங்க உள்ளே வரலாமா?'

குரல் கேட்டு நிமிர்ந்து பார்த்தார் சசிகுமார்.

வாசலில் ரமணனும் பிரேம்நாத்தும் புன்னகையுடன் நின்று கொண்டிருந்தனர்.

'உள்ளே வாங்க'

அவர்கள் இருவரும் உள்ளே வந்ததும் கமிஷனர் எழுந்து சென்று அறையின் கதவை சாத்திவிட்டு வந்தார்.

இருவரையும் கைகுலுக்கினார்.

'அருமையா திட்டத்தை செஞ்சு முடிச்சிட்டீங்க. வாழ்த்துக்கள்.'

'சார். நம்மோட ரகசிய திட்டமான 'வில் துளைக்கும் அம்புகள்' நடவடிக்கை பற்றி எனக்கே குழப்பமா இருக்கு. கொஞ்சம் தெளிவா சொல்றீங்களா?' சந்தேகத்துடன் கமிஷனரை பார்த்துக் கேட்டார் பிரேம்நாத்.

'சொல்றேன். நாம இதுவரைக்கும் கொலை கொள்ளைகளை செய்துகிட்டு பொதுமக்களுக்கு அச்சுறுத்தலா இருந்த நூற்றுக்கணக்கான ரவுடிகளை என்கவுண்டர்ல போட்டுத்தள்ளியிருக்கோம். ஆனா ரவுடிகளோ ரவுடியிசமோ குறையவே இல்லை.

அதாவது நாம அம்புகளைத்தான் உடைத்தெறியறோமே தவிர அதை செலுத்திய வில்லை நாம மறந்திடறோம். வில்லை உடைச்சுப் போட்டுட்டா அம்புகள் செயலிழந்து போய் விடும்.'

'அதாவது ரவுடிகளை காலி பண்ணினாலும் அவர்களை உருவாக்குற பணக்கார அதிகார வர்க்கத்தை நாம நெருங்க முடியவில்லை. அதனால அவர்கள் உருவாக்குற ரவுடிகளை வெச்சே அவர்களை காலி பண்றதுதான் 'வில் துளைக்கும் அம்புகள்' என்கிற ரகசிய நடவடிக்கையோட நோக்கம்.

'இதை நம்ம டிபார்ட்மென்ட்ல இருக்கிற நம்பிக்கையான சிலரை மட்டுமே தேர்வு பண்ணி இந்த நடவடிக்கைகளுக்கு பயன்படுத்திகிட்டு வர்றோம். நம்ம டிபார்ட்மென்ட்ல உள்ள மற்ற ஆட்களுக்கு கூட தெரியாமத்தான் இந்த ரகசிய நடவடிக்கைகள் நடந்துகிட்டு இருக்கு.'

'அது சரி சார். மார்ட்டின் கும்பலை ஒழித்துக்கட்டிய நடவடிக்கையில என்னென்ன நடந்தது?'

ரமணன் இடைமறித்தார்.

'அதை நான் சொல்றேன். மார்ட்டின்,பாபு, மூர்த்தி மூணு பேரும் மதுரைக்குப் பக்கத்தில இருக்கிற ஒரு கிராமத்தைச் சேர்ந்தவங்க. சுமார் முப்பது வருசத்துக்கு முன்னாடி அவங்க இளைஞர்களா இருந்த காலத்தில மூணுபேரும் சேர்ந்து அங்கேயிருந்த ஒரு கோயில் சிலையை திருட முயற்சி பண்ணி பொதுமக்கள் கிட்ட மாட்டிகிட்டாங்க. பொதுமக்கள் அவங்க மூணு பேரையும் அடிச்சு ஊரை விட்டே துரத்தி விட்டுடுச்சு.

அவனுங்க மூணு பேரும் சென்னைக்கு ஓடி வந்துட்டானுங்க. இங்க கள்ளக்கடத்தல் மாதிரியான சட்டத்துக்குப் புறம்பான காரியங்களில் ஈடுபட்டு கோடிக்கணக்கில் சம்பாதிச்சிட்டானுங்க.

அவனுங்க மூணு பேரும் கல்யாணம் ஏதும் செஞ்சுக்காம சம்பாதிப்பதிலேயே குறியா இருந்து தனிமரமாகவே வாழ்ந்துகிட்டு வந்தாலும் பணம் சேர்க்கிறதுல இருந்த வெறி அடங்காம பல சட்டவிரோத நடவடிக்கைகள்ல ஈடுபட்டு வந்தானுங்க. அரசியலில் அவுனுங்களுக்கு செல்வாக்கு அதிகரிச்சதால அவனுங்க மேல எந்த நடவடிக்கையும் எடுக்க முடியாம இருந்துச்சு.

பிற்காலத்துல அவனுங்க கிட்ட வேலைக்குச் சேர்ந்த ராஜா
அவனுங்க செய்த பல குற்றச்செயல்களுக்கு உதவியா இருந்து வந்தான்.

அந்த நேரத்திலேதான் மார்ட்டின் கும்பலுக்கு நாம வலை விரிச்சோம். அந்தக் கும்பலை கூண்டோட ஒழிக்கிறதுக்காக 'வில் துளைக்கும் அம்புகள்' நடவடிக்கையை துவங்கினோம்.

மார்ட்டின் கும்பலிலேயிருந்து கழண்டு போகப்பார்த்த ராஜாவை கொல்றதுக்காக அவங்க மூணு பேரும் திட்டம் போட்டாங்க. அதுக்காக என்னை அணுகினானுங்க.

ராஜா கிட்டே இந்த விசயத்தை சொல்லி அவனை உசுப்பேத்தி விட்டு என்கவுண்டர் செய்யப்போறது போல அவனை கூட்டிகிட்டுப் போய் வேண்டுமென்றே அவனை தப்பிக்க வெச்சேன்.'

'வெறி பிடிச்சவன் போல மாறின ராஜா முதல்ல மூர்த்தியை தீர்த்துக் கட்டிட்டான். ஆனா அடுத்ததா மார்ட்டினைக் கொல்ல முயற்சி பண்ணினப்போ அவர் கிட்டே மாட்டி அவர் கையாலேயே கொலை செய்யப்பட்டான்.ஆனா அவன் கொலை செய்யப்பட்ட விசயம் அப்ப நமக்கே தெரியாது'

'அந்த நேரத்திலே பாபுவை வெச்சு மார்ட்டினை கொல்றதுக்கும் நான் திட்டம் போட்டேன். சொத்தை அடையறதுக்காக மூர்த்தி மற்ற ரெண்டுபேரையும் கொலை பண்ண திட்டம் தீட்டியிருந்ததா ஒரு பொய்யைச்சொல்லி அதுபோன்ற காரியத்தை பாபு செய்யும்படி அவர் மனசில் ஒரு எண்ணத்தை தோற்றுவிக்க முயற்சி பண்ணினேன். ஆனா பாபு என்னோட வலையில் சிக்காம, துரோகம் பண்ண மாட்டேன்னு அடம்பிடிச்சாரு. ஆனா அந்த வலையில மார்ட்டின் விழுந்துட்டார். சொத்துக்காக பாபுவை கொலை பண்ணினார். கடைசியா இருந்த மார்ட்டினையும் காலி பண்றதுக்காக நானே ராஜா மாதிரி பேசி போன்ல அவரை கொலை செய்யப்போறதா மிரட்டினேன். அவரும் ராஜாவைத்தான் கொலை பண்ணிட்டோமே. இது என்ன புது பிரச்சினைன்னு குழம்பிப்போய் என்னை கூப்பிட்டாரு. நானும் அவர்கிட்டே தற்கொலை கடிதம் நாடகம் எழுதச்சொல்லி அவரை சுட்டுத்தள்ளிட்டு அவரே தற்கொலை பண்ணிகிட்டதா செட்டப் பண்ணிட்டேன். ஒருவழியா நம்மோட 'வில் துளைக்கும் அம்புகள்' நடவடிக்கை முடிஞ்சிடுச்சி.

சொல்லி முடித்துவிட்டு சோம்பல் முறித்தார் ரமணன்.

கமிசனர் அலமாரியிலிருந்து ஒரு கோப்பினை எடுத்து மேஜை மீது போட்டார்.

'நம்மோட 'வில் துளைக்கும் அம்புகள்' நடவடிக்கையில அடுத்த கட்டமா நாம ஒழிச்சுக்கட்டப்போற கும்பல் பற்றின விவரம் இதுல இருக்கு. நாம இப்ப...'

'சார். அதுக்கு முன்னாடி சூடா ஒரு கப் காபி குடிக்கலாமா?'

(தொடர் நிறைவடைந்தது.)

வில் துளைக்கும் அம்புகள் - 2

2010-03-01T14:38:00.006+05:30

..

பகுதி -1

பகுதி -2

'இன்ஸ்பெக்டர் தம்பி நீ என்ன சொன்னாலும் நான் ஏத்துக்க மாட்டேன். அவன் தப்பிச்சுப் போயிட்டான்னு என்கிட்டயே வந்து வெட்கமில்லாம சொல்லிகிட்டு இருக்கே. நீ என்ன பண்ணுவியோ எனக்குத் தெரியாது. இன்னும் இருபத்தி நாலு மணி நேரத்துல அவன் செத்துட்டான்னு எனக்கு சேதி வரணும். இல்லைன்னா உன் வேலை போயிடுச்சுன்னு உனக்கு சேதி வரும்.' எதிரில் நின்றிருந்த ரமணனிடம் கோபமாக கத்தினார் மூர்த்தி.

'ரெண்டு நாள் அவகாசம் கொடுங்கய்யா. அவனை எப்படியாவது கண்டுபிடிச்சு போட்டுத்தள்ளிடறேன். நான் போய்ட்டு வர்றேன்'

வாசலை நோக்கி நடக்க ஆரம்பித்தார் ரமணன்.

'கொஞ்சம் நில்லு தம்பி.'

ரமணன் திரும்பிப் பார்த்தார்.

'என்னங்கய்யா'

'நாங்கதான் அவனை போலீஸ்ல மாட்டிவிட்டு போட்டுத்தள்ள சொன்னோம்னு ஏதாவது அவன் கிட்ட உளறிட்டியா?'

'அ...அது வந்து.. அப்படியெல்லாம் அவன்கிட்ட எதுவும் சொல்லலீங்க. நீங்க தைரியமா இருங்க. ஏன் உங்களுக்கு பாதுகாப்புக்கு ஆட்கள் வெச்சிருப்பீங்களே? இங்க ஏன் ஒருத்தரையும் காணோம்?':

'எல்லா பசங்களுமே அந்த ராஜா பயலோட நல்லா பழகினவனுங்க. அதனால நான் அவனுங்க யாரையும் இந்த சூழ்நிலையில நம்பலை. எல்லாரையும் வெளியில அனுப்பிட்டேன். என்கிட்ட பிஸ்டல் இருக்கு. நீ கிளம்பு. நான் பார்த்துக்கறேன்.'

ரமணன் மூர்த்தியினுடைய வீட்டிலிருந்து வெளியேறினார்.

வாசலில் நின்றிருந்த ஜீப்பினை கிளப்பி பிரதான சாலையில் திரும்பி இருளில் கரைந்து போனார்.

......

வீட்டின் கதவை உட்புறமாக தாழிட்டுச் சாத்திய மூர்த்தியின் நெற்றியில் குழப்ப ரேகைகள் பரவ ஆரம்பித்தன.

'ஒருவேளை இந்த இன்ஸ்பெக்டர் ராஜா கிட்ட ஏதாவது உளறி வெச்சிருப்பானோ? எதுக்கும் நாம எச்சரிக்கையா இருக்கிறது நல்லது' என எண்ணியபடி தனது கைத்துப்பாக்கி இருக்கும் அறைக்குள் அதை எடுப்பதற்காக நுழைந்தார்.

உள்ளே..

கைத்துப்பாக்கி வைக்கப்பட்டிருந்த மேஜை மீது கையில் கத்தியுடன் அமர்ந்தவாறு புன்னகைத்தான் ராஜா.

.............

ரமணன் ஜீப்பை காவல் நிலையம் நோக்கி செலுத்திக்கொண்டிருந்தார்.

செல்போன் ஒலித்தது.

'மிஸ்டர் ரமணன். டி.எஸ்.பி ஆபிசில இருந்து பேசறோம். கைதியை தப்ப விட்டதுக்காக உங்களை சஸ்பெண்ட் பண்ணியிருக்காங்க. நீங்க நாளைக்கு காலையில இங்க நேரா வாங்க.'

'நான் எதிர்பார்த்ததுதான். நன்றி சார்'

ரமணன் ஜீப்பினை திருப்பி காவலர் குடியிருப்பு நோக்கி செலுத்தினார்.

ஜீப் இருளை கிழித்துக்கொண்டு ஒரு வளைவில் திரும்பிய போது சாலையோரம் இருந்த புளியமரத்தின் பின்புறத்தில் மறைந்திருந்த ராஜா ஆவேசமாக சாலையை நோக்கிப் பாய்ந்தான்.

..........

மூர்த்தியின் உடல் அவருடைய வீட்டில் நடுக்கூடத்தில் கிடத்தப்பட்டிருந்தது.

உறவினர்கள் என்று யாரும் அவருக்கு இல்லாததால் அங்கு அவருக்காக அழுவதற்கு யாரும் இல்லை.

அவரிடம் வேலை செய்த ஆட்கள் சுற்றிலும் சோகமாக நின்றுகொண்டிருந்தனர்.

அருகில் மார்ட்டினும் பாபுவும் நின்றிருந்தனர்.

எதிரில் நின்றிருந்த ரமணன் பாபுவிடம் நெருங்கி அவரை தனியே அழைத்துக்கொண்டு போனார்.

'பாபு சார். உங்க கிட்ட ஒரு முக்கியமான விசயம் சொல்லணும். இன்னைக்கு ராத்திரி பெசன்ட் நகர் கடற்கரையில உங்களை சந்திக்கிறேன்.'

கூறி விட்டு அங்கிருந்து வெளியேறினார் ரமணன்.

........

பெசனட் நகர் கடற்கரை.

இரவு 7 மணி.

கடல் அலைகள் வழக்கத்தைவிட வேகமாக ஆர்ப்பரித்துக் கொண்டிருந்தன.

பாபு கடற்கரையின் சாலையோரம் காரை நிறுத்திவிட்டு அருகில் நின்றபடி கடல் அலைகளை வேடிக்கை பார்த்துக்கொண்டிருந்தார்.

சிறிது நேரத்தில் காரின் அருகில் ஸ்ப்ளெண்டரை நிறுத்திவிட்டு கீழிறங்கினார் ரமணன்.

'வாங்க பாபு சார். மணல்ல உட்கார்ந்து பேசுவோம்'

இருவரும் கடலை நோக்கி நடந்தனர்.

கடலோரம் கரையில் நிறுத்தப்பட்டிருந்த ஓர் படகின் அருகில் இருவரும் அமர்ந்தனர்.

'பாபு சார்! நீங்க, மார்ட்டின் அப்புறம் இறந்துபோன மூர்த்தி மூணு பேரும் பார்ட்னரா சேர்ந்து பல கோடி ரூபாய்க்கு பிசினஸ் பண்றீங்களே. அதோட மதிப்பு எவ்வளவு இருக்கும்?'

'சுமாரா நானூறு கோடி இருக்கும். எதுக்கு தம்பி கேட்கறீங்க?'

'சார் நான் இப்ப சொல்லப்போற விசயம் உங்களுக்கு ரொம்ப அதிர்ச்சியா இருக்கலாம். ராஜாவை கைதுபண்ணி கஸ்டடியில வெச்சிருந்தப்ப அவன் என்கிட்ட ஒரு விசயம் சொன்னான்.'

'என்ன சொன்னான்?'

'இறந்துபோன மூர்த்தி ஐயா அந்த நானூறு கோடி சொத்துக்களையும் தனக்கு மட்டுமே சொந்தமாக்கிக் கொள்ள உங்களையும் மார்ட்டின் சாரையும் கொலை பண்ணச் சொல்லி ராஜா கிட்ட சொல்லியிருக்காரு.'

'கண்டிப்பா அவர் அப்படி செய்ய வாய்ப்பே இல்லை. ராஜா உங்ககிட்ட பொய் சொல்லியிருக்கான்.'

'நடக்கிறதுக்கும் வாய்ப்பு இருக்கு சார். இந்த காலத்திலே பணம்தானே எல்லாம் செய்யுது. நீங்க மூணு பேரும் எனக்கு பணம் கொடுத்ததாலதானே ராஜாவை போட்டுத்தள்ள ஒத்துகிட்டேன். அப்புறம் இன்னொரு முக்கியமான விசயம்.'

'என்ன தம்பி?'

'நேத்து ராத்திரி நான் ராஜாவை பார்த்தேன்.'

' என்னது அவனை பார்த்தியா?'

'ஆமா சார். நான் வீட்டுக்கு போறதுக்காக ஜீப்ல போய்க்கிட்டு இருந்தப்ப எதிர்பாராவிதமா அவன் சாலையில குறுக்கே ஓடினான்.நான் அந்த நேரத்திலே அங்க வருவேன்னு எதிர்பார்த்திருக்க மாட்டான். என்னை பார்த்ததும் அதிர்ச்சியாயிட்டான்'

'அவனை அங்கேயே சுட்டுக்கொல்ல வேண்டியதுதானே''

'நானும் அதற்கு முயற்சி பண்ணினேன். ஆனா அவன் இருட்டில ஓடி மறைஞ்சிட்டான். துப்பாக்கியையும் பயன்படுத்த முடியாது. ஏன்னா என்னை சஸ்பெண்ட் பண்ணிட்டாங்க. அதனால என்னால் அந்த நேரத்தில ஒன்னும் செய்ய முடியாம போயிருச்சு.மூர்த்தி சாருக்கு அடுத்தபடியா அவனோட அடுத்த குறி உங்க மேல இருக்கலாம். எதுக்கும் எச்சரிக்கையா இருங்க சார்.'

'அதை நான் பார்த்துக்கறேன். நீங்க போய்ட்டு வாங்க ரமணன்.'

'சார். கடைசியா நான் உங்க கிட்ட ஒரு விசயம் கேட்கணும்.நீங்க தப்பா எடுத்துக்கூடாது.'

'கேளுங்க. என்ன விசயம்?'

'மூர்த்தி சாரை நீங்க கொலை பண்ணியிருப்பீங்களோன்னு எனக்கு ஒரு சின்ன சந்தேகம்.'

'இன்ஸ்பெக்டர் தம்பி என்ன விளையாடறீங்களா?'

'தப்பா எடுத்துக்காதீங்க சார். உங்களுக்கு உதவி பண்ணத்தான் கேட்கிறேன். ஒருவேளை மூர்த்தி சார் நினைச்சது போல நீங்களும் சொத்துக்கு ஆசைப்பட்டு அவரை கொலை பண்ணியிருந்தா தயங்காம என்கிட்ட சொல்லுங்க. அப்பத்தான் இந்தப் பிரச்சினையிலேயிருந்து நான் உங்களை காப்பாத்த முடியும். ஏன்னா இப்ப இந்த கொலை கேஸை விசாரிச்சிகிட்டு இருக்கிற இன்ஸ்பெக்டர் பிரேம்நாத் ரொம்ப நேர்மையானவர்னு எங்க டிபார்ட்மென்ட்ல பேசிக்கிறாங்க.'

'நான் இதுவரைக்கும் அப்படி நினைச்சது இல்லை. இனிமேலும் நானும் மார்ட்டினும் எப்போதும் போல சேர்ந்துதான் பிசினஸ் பண்ணப்போறோம். நாங்க செய்யிற தொழில்கள் தப்பானதா இருக்கலாம். ஆனா எங்களுக்குள்ள எப்போதும் துரோகம் இருக்காது.'

'சரி சார். நான் உங்க ஆள். அதனாலதான் கேட்டேன். நீங்க எந்த தப்பு பண்ணினாலும் உங்களை காப்பாத்த வேண்டியது என்னோட பொறுப்பு. நான் கிளம்பறேன்.'

அங்கிருந்து கிளம்பினார் ரமணன்.

குழப்பத்துடன் காரை நோக்கி நடந்த பாபுவின் செல்போன் ஒலித்தது.

எடுத்தார்.

'டேய் பாபு. நான்தான்டா ராஜா பேசறேன். என்னோட அடுத்த குறி நீதான்டா'

மறுமுனையில் தொடர்பு அறுந்துபோனது.

.....................

நள்ளிரவு.

நீலாங்கரையின் ஒதுக்குப்புறமான பகுதியிலிருந்த தனது பங்களாவில் காரை நிறுத்திவிட்டு இறங்கினார் மார்ட்டின்.

செல்போன் ஒலித்தது.

'மார்ட்டின் நான்தான் மூர்த்தி பேசறேன்.'

'என்ன பாபு இப்பத்தான் போன் பண்ணி ரமணன் உன்கிட்ட சொன்ன விசயத்தையெல்லாம் என்கிட்ட சொல்லிகிட்டு இருந்தே. அதுக்குள்ள திரும்பவும் போன் பண்றியே. என்ன விசயம்.?'

'மார்ட்டின். இப்ப கொஞ்சம் நேரத்துக்கு முன்னாடி ராஜா எனக்கு போன் பண்ணினான். என்னை கொலை செய்யப்போறதா மிரட்டினான்.'

'நீ பயப்படாம இரு பாபு. அவனை போலீஸ் தீவிரமா தேடிக்கிட்டு இருக்காங்க. அவனை கூடிய சீக்கிரத்திலே கண்டுபிடிச்சு போட்டுத்தள்ளிடுவாங்க. நீ கவலைப்படாதே. அதான் உன்கிட்டே துப்பாக்கி இருக்கே. அப்புறம் நீ ஏன் பயப்படுறே?. நான் உன்கிட்ட அப்புறமா பேசறேன்.'

இணைப்பைத் துண்டித்தார் மார்ட்டின்.

தூரத்தில்...

சருகுகள் மிதிபடும் சத்தம் கேட்டது.

..........

காலை 10 மணி.

காவல் நிலையம்.

புதிதாய் பொறுப்பேற்றிருந்த இன்ஸ்பெக்டர் பிரேம்நாத் மூர்த்தி கொலை வழக்கு சம்பந்தமான கோப்புகளை புரட்டிப்பார்த்துக்கொண்டிருந்தார்.

ஒருவன் மூச்சிறைக்க உள்ளே ஓடி வந்தான்.

'யாருய்யா நீ. உனக்கு என்ன வேணும்?'

'அய்யா. நான் பாபு ஐயா வீட்டு வாட்ச்மேனுங்க. கொஞ்சம் நேரத்திலே வந்திடறேன்னு சொல்லிட்டு நேத்து ராத்திரி காரை எடுத்துகிட்டு போனவரு இன்னும் வீட்டுக்கு திரும்பி வரலைங்க.'

'யோவ். பெரிய மனுசங்களுக்கு ஆயிரம் வேலை இருக்கும்.
திரும்பி வந்துடுவார். நீ வீட்டுக்குப் போ.'

அப்போது தொலைபேசி ஒலித்தது.

'சார். நான் தாம்பரம் ஏரியா இன்ஸ்பெக்டர் பேசறேன். இங்க தாம்பரம் மேம்பாலத்துக் கீழே தண்டவாளத்தில் ரயிலில் அடிபட்டு சிதைந்து போன ஒரு உடல் கிடக்குது. உங்க கேஸ் சம்பந்தப்பட்டவரா இருக்கலாம். கொஞ்சம் இங்க வர்றீங்களா?'

............

இன்ஸ்பெக்டர் பிரேம்நாத் தாம்பரம் போய்ச்சேர்ந்தபோது தண்டவாளத்தின் அருகே வெள்ளைத்துணியால் உடல் மூடி வைக்கப்பட்டிருந்தது. சுற்றிலும் கூட்டம் நின்று வேடிக்கை பார்த்துக்கொண்டிருந்தது.

இன்ஸ்பெக்டர் வெள்ளைத்துணியை விலக்கி முகத்தைப் பார்த்தார்.

கோரமாக இறந்துபோய்க் கிடந்தான் ராஜா.

......

நெற்றியை கீறியபடி அமர்ந்திருந்தார் இன்ஸ்பெக்டர் பிரேம்நாத்.

கான்ஸ்டபிள் சந்தானம் அருகில் வந்தார்.

'சார். ராஜா ரயிலில் அடிபட்டு இறந்துபோயிட்டான். அப்படின்னா அவன் கடத்திட்டுப்போன பாபுவோட கதி என்னன்னு தெரியலையே சார்?'

'நானும் அதைத்தான் யோசிச்சிகிட்டு இருக்கேன் சந்தானம்.'

கான்ஸ்டபிள் முருகன் அப்போது உள்ளே வந்தார்.

'சார். நான் சொல்ல மறந்திட்டேன். ஒரு மணி நேரத்துக்கு முன்னாடி மெரினா கடற்கரை போலீஸ் ஸ்டேஷன்லேயிருந்து பேசினாங்க. கரையில் ஒரு பிரேதம் ஒதுங்கி கிடக்குதாம்.'

.....

அவசரமாக மெரினா கடற்கரையில் உடல் ஒதுங்கியிருந்த இடத்தினை வந்தடைந்தார் இன்ஸ்பெக்டர் பிரேம்நாத்.

அங்கே...

பாபுவின் பிரேதம் தண்ணீரில் உப்பிப்போய் மீன்களால் கடித்து குதறப்பட்டு கிடந்தது.

.....

மார்ட்டின் தனது வீட்டில் சிந்தனையில் அமர்ந்திருந்தார்.

செல்போன் அடித்தது.

'சார். நான் இன்ஸ்பெக்டர் பிரேம்நாத் பேசறேன். பாபு சாரை கடத்திட்டுப்போய் கொன்னு கடல்ல போட்டுட்டு போன ராஜா எதிர்பாராவிதமா ரயிலில் அடிபட்டு செத்துப்போயிட்டான். இந்தப் பிரச்சினை இதோட முடிஞ்சது. இனிமே நீங்க கவலைப்படாம இருங்க.'

'ரொம்ப நன்றி தம்பி. நண்பர்களை இழந்த எனக்கு உங்க பேச்சு கொஞ்சம் ஆறுதலா இருக்கு. வணக்கம்.'

தொடர்பை துண்டித்தார் மார்ட்டின்.

செல்போன் மீண்டும் கத்தியது.

எடுத்தார்.

மறுமுனையிலிருந்து குரல் ஒலித்தது.

'உன்னைக் கொல்லாம விட மாட்டேன்டா.'

.........

'டாக்டர் நீங்க என்ன சொல்றீங்க?'

'ஆமாம் இன்ஸ்பெக்டர். ராஜா ரயிலில் அடிபட்டு சாகவில்லை. யாரோ அவனை கழுத்தை நெறிச்சி கொன்னு, இறந்துபோன உடலை தண்டவாளத்திலே வீசிட்டுப்போயிருக்காங்க.'

'அப்படின்னா அவன் கொல்லப்பட்டது என்னைக்கு?'

'உடல் பரிசோதனைப்படி பார்த்தா அவன் உயிர் பிரிஞ்ச நேரம் செவ்வாய்கிழமை இரவு 11 மணிக்கு.'

'சரி. பாபு உடலையும் நீங்கதானே பிரேதபரிசோதனை பண்ணினீங்க. அவர் எப்படி இறந்திருக்கார். அவரை எப்போது ராஜா கொலை பண்ணியிக்கான்?'

'இன்ஸ்பெக்டர் சார்! பாபு துப்பாக்கியால சுடப்பட்டு இறந்திருக்கார். ஆனா பாபுவை ராஜா கொலை பண்ண வாய்ப்பே இல்லை. ஏன்னா பாபு இறந்தது ராஜா இறந்து ஆறு மணி நேரம் கழிச்சு. அதாவது புதன்கிழமை விடியற்காலை 5 மணிக்கு.'

அதிர்ச்சியுடன் எழுந்தார் பிரேம்நாத்.

.............

வில் துளைக்கும் அம்புகள்

2010-02-28T16:18:00.007+05:30

.....

பிஸ்டலை எடுத்து மேஜை மீது வைத்தான் ராஜா.

எதிரில் அமர்ந்திருந்த மார்ட்டின், மூர்த்தி மற்றும் பாபு மூவரும் ஒருவரை ஒருவர் பார்த்துக்கொண்டனர்.

'நான் உங்களுக்காக எவ்வளவோ கொலை,கொள்ளைகளை பண்ணியிருக்கேன். பிரியாவை நான் சந்திச்சதுக்கப்புறம் எனக்கும் வாழ்க்கையோட இன்னொரு அழகான பக்கம் தெரிய ஆரம்பிச்சது.
நான் அந்த நிம்மதியான உலகத்தை தேடி போகப்போறேன். இனிமே என்னை தொந்தரவு பண்ணாதீங்க ப்ளீஸ்.'

'இதப்பாரு ராஜா. இதுவரைக்கும் நீ எங்களுக்கு பண்ணின உதவிகளுக்கு நன்றி. உனக்கு ஒரு நல்ல வாழ்க்கை அமையறப்போ அதை நாங்க கெடுக்க விரும்பல. ஒரு நிமிசம் இரு.'

மூர்த்தி எழுந்துபோய் அருகிலிருந்த அலமாரியை திறந்து பணப்பெட்டியை எடுத்து ராஜாவிடம் நீட்டினார்.

'வாங்கிக்கப்பா. இதுல கொஞ்சம் பணம் இருக்கு. நீ உன்னோட வாழ்க்கையை நல்லபடியா அமைச்சுக்க. போய்ட்டு வா.'

ராஜா பணப்பெட்டியை வாங்கிக்கொண்டு விருவிருவென அங்கிருந்து வெளியேறினான்.

......

குளிர்காற்று வேகமாக வீசியது. மேகம் கருக்கத் தொடங்கியது. ஓரிரு மழைத்துளிகள் முகத்தில் விழுந்து பார்வையை மறைக்கத் தொடங்கியதும் பல்சர் வேகத்தை அதிகரித்தான் ராஜா.

இடுப்பிலிருந்த செல்போன் அழைத்தது.

பிரியா பேசினாள்.

'என்னப்பா. நான் எல்லாத்தையும் எடுத்து வெச்சிட்டு தயாரா இருக்கேன். சீக்கிரமா வர்றதா சொல்லிட்டு எங்க போய்ட்ட? சீக்கிரம் வாடா'

'வந்துகிட்டே இருக்கேன் செல்லம். இன்னும் அரைமணி நேரத்திலே வந்துடறேன்.'

இணைப்பை துண்டித்துவிட்டு செல்போனை சட்டைப்பையில் போட்டுவிட்டு நிமிர்ந்தபோது எதிரில் சாலை நடுவில் புதிதாய் முளைத்திருந்த சோதனைச் சாவடியை மிக அருகில் நெருங்கியிருந்தான்.

......

ஜீப் அந்த நள்ளிரவின் இருளை கிழித்துக்கொண்டு காட்டுப்பாதையில் பயணித்துக் கொண்டிருந்தது.

இன்ஸ்பெக்டர் ரமணன் ஜீப்பை ஓட்டிக்கொண்டிருந்தார். பின்னால் துப்பாக்கியுடன் அமர்ந்திருந்த இரு போலீசாருக்கு மத்தியில் கைவிலங்குடன் ராஜா அமர்ந்திருந்தான். அவனுக்கு எதிரிலும் இரண்டு போலீசார் துப்பாக்கியுடன் அமர்ந்திருந்தனர்.

ரமணன் கேட்டார்.

' என்ன தம்பி. அமைதியா வர்ற? உன்னை எங்க கூட்டிகிட்டு போறோம்னு தெரியுமா?'

'தெரியும். என்கவுன்டர்ல போட்டுத் தள்றதுக்கு.'

'ஆகா. புத்திசாலி பையன்தான் நீ. அதனாலதான் மார்ட்டின் ஐயா உன்னை இவ்வளவு நாளா வேலைக்கு வெச்சிருந்திருக்காரு. ஆனா நீ அவரை விட்டு விலகிப்போறதுல அவருக்கு கொஞ்சம் கூட விருப்பம் இல்லை. ஏன்னா அவங்க மூணு பேரோட அத்தனை ரகசியங்களும் தெரிஞ்சவன் நீ. பிற்காலத்துல அவங்களுக்கு ஆப்பு வெச்சிடுவேன்னு நினைக்கிறாங்க. அவங்களே உன்னை போட்டுத் தள்ளியிருப்பாங்க. ஆனா நீ ரொம்ப நாள் அவங்களுக்கு விசுவாசமா இருந்ததால அவங்களுக்கு மனசு வரலை. அதனாலதான் அந்த பொறுப்பை என்கிட்ட ஒப்படைச்சி இருக்காங்க.'

ஜீப் பாதையிலிருந்து விலகி புதர்களுக்கிடையில் பயணித்து மரங்களடர்ந்த ஒரு பகுதியில் கிரீச்சிட்டு நின்றது.

ஜீப்பிலிருந்து குதித்தார் ரமணன். இடுப்பிலிருந்த கைத்துப்பாக்கியை உருவி உள்ளங்கையில் வைத்துக்கொண்டார்.

'கான்ஸ்டபிள் அவனை இழுத்துகிட்டு வாங்கய்யா.'

ராஜா கைவிலங்குடன் கீழே இறக்கப்பட்டான்.ஜீப் விளக்குகள் அணைக்கப்பட்டன.

'கான்ஸ்டபிள் ரெண்டு பேரு ஜீப் பக்கத்தில நில்லுங்க. ரெண்டுபேரு என்னோட வாங்க.' என்றபடி ராஜாவின் சட்டைக்காலரை பிடித்து தள்ளியபடி ஒரு அடர்ந்த புதருக்கு அருகில் அவனை இழுத்துச்சென்றார் ரமணன்.

நிலவு தேய்ந்துபோய் மிகக்குறைவான வெளிச்சத்தினை பூமியின் மீது பொழிந்துகொண்டிருந்தது.

'கான்ஸ்டபிள் அவன் கைவிலங்கை அவிழ்த்துவிடுய்யா. பாவம் சாகப்போறப்ப சுதந்திரமா சாகட்டும்.'

கை விலங்கு அவிழ்க்கப்பட்டது.

'நீங்க ரெண்டு பேரும் இங்கயே நில்லுங்க.'

அங்கேயே இரு கான்ஸ்டபிள்களையும் தடுத்து நிறுத்திய ரமணன் ராஜாவின் பின்னந்தலையில் கைத்துப்பாக்கியை வைத்து அழுத்தியபடி அவனை அடர்ந்த இருளில் தள்ளிக்கொண்டு சென்றார்.

.....

ஜீப் அருகில் நின்றிருந்த கான்ஸ்டபிள் சந்தானம் அருகிலிருந்த கான்ஸ்டபிள் முருகனிடம் தீப்பெட்டியை வாங்கி சிகரெட்டை பற்றவைத்தபோது துப்பாக்கி வெடிக்கும் சத்தம் கேட்டது.

'யோவ் முருகா. நம்ம இன்ஸ்பெக்டர் அந்தப் பையனோட கதையை முடிச்சிட்டார் போலிருக்கு. கிளம்பவேண்டியதுதான் ஜீப்ல ஏறு.' என்றபடி பற்றவைத்த சிகரெட்டை கீழே போட்டு நசுக்கிவிட்டு நிமிர்ந்தபோது துப்பாக்கிகள் மீண்டும் வெடித்தன. சிறிது நேரத்தில் காட்டுப்பகுதியிலிருந்து சிலபேர் ஜீப் நின்ற திசை நோக்கி சருகுகளை மிதித்துக்கொண்டு ஓடிவரும் சத்தம் கேட்டது.

சந்தானமும் முருகனும் பதட்டமாகி துப்பாக்கியை எடுத்து சத்தம் வரும் திசை நோக்கி திருப்பினார்கள்.

இன்ஸ்பெக்டர் காலில் ரத்தம் வழிய, அவருடன் சென்ற இரு கான்ஸ்டபிள்களும் அவரை தூக்கிக்கொண்டு ஜீப் நோக்கி ஓடி வந்துகொண்டிருந்தனர்.

'யோவ் சந்தானம் ஜீப்பை சீக்கிரமா எடுத்து ஆஸ்பத்திரிக்கு போ. இன்ஸ்பெக்டர் சார் காலில கீழ கிடந்த மரக்கட்டையால அடிச்சிட்டு அவன் தப்பிச்சிப்போயிட்டான்.'

ஜீப் ரமணனை ஏற்றிக்கொண்டு வேகமாக பறந்தது.

.......

(தொடரும்)

அமெரிக்காவிலிருந்து ஓர் அழைப்பு!

2010-02-24T20:29:00.014+05:30

.

22-06-2010 திங்கட்கிழமை இரவு 9.30 க்கு எனது அலைபேசிக்கு அமெரிக்காவிலிருந்து மென்பொருள் துறையில் பணியாற்றும் பழமைபேசியிடமிருந்து அழைப்பு வந்தது.

'மணிப்பயல்! நல்லாத்தானே எழுதறீங்க. ஆனா தொடர்ந்து எழுதறது இல்லையே ஏன்?' ன்னு கேட்டார்.

வலைப்பதிவுகளில் நமது எண்ணங்களையும் படைப்புகளையும் எவ்வித கட்டுப்பாடுகளுமற்ற இணைய உலகில் உலவ விடுவதிலும், உலகம் முழுவதும் நூற்றுக்கணக்கானோர் அதனை படித்து பின்னூட்டம் மூலமாக பாராட்டுவதிலும் பெறுமகிழ்ச்சி ஏற்படவே செய்கிறது.

பின்னர் சில படைப்புகளை விகடன்.காம் க்கிற்கு அனுப்பி வைத்தபோது அவர்களும் தனது வலைத்தளத்தில் அவற்றை வெளியிட்டு மின்னஞ்சல் மூலமாக நன்றி (மட்டுமே) தெரிவித்தனர்.

ஆனாலும் பொருளீட்டல் மட்டுமே வாழ்க்கை என்ற ஒற்றை அச்சில் சுழன்று கொண்டிருக்கும் தற்கால உலகில் பதிவுகள் எழுதுவதில் நேரம் செலவழிப்பது வீண்வேலையாக சில சமயங்களில் எண்ண வைத்துவிடுகிறது.

பழமைபேசியினுடைய பதிவுகளின் தூய தமிழ்நடை கண்டு நான் அவரை ஈழத்தமிழராகவே இதுவரை நினைத்திருந்தேன்.

அவருடைய சமீபத்திய பதிவான யாழினி யிலும் இலங்கைத்தமிழை பயன்படுத்தியிருந்தார்.

'நீங்க ஈழத்தமிழரா?' என்று அவரிடமே கேட்டேன்.

'இல்லை. நான் கோயம்புத்தூர்க்காரன். இங்க ஈழத்துச் சகோதரர்கள் நிறைய பேர் என்னோட நண்பர்களா இருக்கிறதால எனக்கும் அந்த மொழி நடை பழக்கமாயிடுச்சு' என்றார்.

புலம் பெயர்ந்தாலும் அவருடை பேச்சில் இன்னும் கொங்கு நாட்டு மொழிவாடை அடித்தது.

தற்போது அமெரிக்காவில் குடும்பத்துடன் வசித்து வருவதாகவம் இருந்தாலும் தாய்நாட்டில் வாழவே விரும்புவதாகவும் கூறினார்.

நானும் ' கோடி ரூபாய் சம்பாதித்தாலும் பிறந்த ஊரில் வாழும் நிம்மதி கிடைக்காதுங்க.' என்று மேலும் அவரை குழப்பிவிட்டேன்.

அதன் தாக்கம் காரணமாகவே அவருடைய தற்போதைய பதிவான சகுந்தலா எழுதப்பட்டிருக்கலாம் என நினைக்கிறேன்.

நான் கும்பகோணத்தை சேர்ந்தவன் எனக்கூறியதும்,

'கும்பகோணம் பக்கமெல்லாம் வந்து சுற்றிப்பார்க்கணும்னு ரொம்ப நாள் ஆசை' என்று கூறினார்.

'கண்டிப்பா வாங்க' என்று அழைப்பு விடுத்தேன்.

கும்பகோணம் மற்றும் அதனைச்சுற்றிய பகுதிகளிலும் வரலாற்றுச்சிறப்புமிக்க பல கோயில்களும் நினைவிடங்களும் உள்ளன.

எந்தக்கோணத்திலிருந்து பார்த்தாலும் ஏதாவதொரு கோயிலின் கும்பம் கண் பார்வைக்கு தட்டுப்படுவதாலேயே கும்பகோணம் என்ற பெயர் வந்ததாக கூறுவார்கள்.

அதனால் கும்பகோணத்தை கோயில்களின் நகரம் என்றும் அழைப்பதுண்டு.

ஆதிகும்பேஸ்வரர் திருக்கோவில்

சாரங்கபாணி திருக்கோவில்

சக்கரபாணி திருக்கோவில்

நாகேஸ்வரன் திருக்கோவில்

ஆகிய சில முக்கிய திருக்கோயில்களும், வரலாற்று சிறப்புமிக்க மகாமகக்குளம் மற்றும் ஏராளமான மற்ற கோயில்களும் நகரின் மையப்பகுதியில் அமைந்துள்ளன.

கும்பகோணத்திலிருந்து சுமார் நான்கு கிலோமீட்டர் தொலைவில் அமைந்துள்ள,இரண்டாம் ராசராச சோழனால் கட்டப்பட்ட தாராசுரம் ஐராவதீஸ்வரர் திருக்கோவில் யுனெஸ்கோ நிறுவனத்தால் பாரம்பரிய நினைவுச்சின்னமாக அறிவிக்கப்பட்டிருக்கிறது. கும்பகோணம் வரும் சுற்றுலாப்பயணிகள் கண்டிப்பாக பார்க்க வேண்டிய கோவில் இது.

கும்பகோணத்திலிருந்து சுமார் ஏழு கிலோமீட்டர் தொலைவில் அமைந்திருக்கிறது முருகனின் ஆறுபடை வீடுகளில் ஒன்றான சுவாமிமலை திருக்கோவில்.

பட்டீச்சுரம் மற்றும் சோழர்களின் தலைநகராக இருந்த பழையாறு என்ற ஊரில் அமைந்துள்ள ராசராசசோழனின் உடல் அடக்கம் செய்யப்பட்ட நினைவிடம் ஆகியவை பார்க்க வேண்டிய பகுதிகள்.

இந்துக்களின் நம்பிக்கையான நவகிரகங்களின் தலங்களும் கும்பகோணத்தைச் சுற்றியே அமைந்துள்ளன.

கும்பகோணத்திலிருந்து நாற்பது கிலோமீட்டர் தொலைவில் இருப்பது மற்றொரு சுற்றுலாத்தலமான தஞ்சாவூர்.

தமிழ் விக்கிபீடியாவில் கும்பகோணம் பற்றி அறிந்துகொள்ள ஏராளமான செய்திகள் உள்ளன.

அப்படியே கூகிள் மேப் பிலும் கும்பகோணத்தை ஒரு பார்வை பார்த்துவிட்டு சுற்றுலாவிற்கான மூட்டை முடிச்சுகளை கட்ட ஆரம்பிக்கலாம்.

தாயகம் வந்தா இந்தப்பக்கம் வந்திட்டுப்போங்க பழமைபேசி!

...

அழைப்பிற்கு நன்றி!

2010-01-23T17:33:00.009+05:30

நேற்று மாலை 5.30 க்கு ஜாக்கிசேகர் கிட்டேயிருந்து போன் வந்தது.

எடுத்தவுடனே 'நன்றி மணிப்பயல்' ன்னு சொன்னார். எதுக்கு நன்றி தெரிவிக்கிறார்னு தெரியாம திருதிருன்னு முழிச்சேன்.

'உங்க வலைப்பக்கத்திலே என்னோட வலைப்பதிவை விளம்பரப்படுத்தினதுக்கு.' ன்னு சொன்னார்.

'நான் இப்பத்தான் உங்க வலைப்பக்கம் படிச்சுப்பார்த்தேன். நல்லா எழுதியிருக்கீங்க. நேரம் கிடைச்சா பின்னூட்டம் போடறேன்.' ன்னு பாராட்டினார்.

300 க்கும் மேற்பட்டவர்கள் வலைப்பதிவை பின்தொடரும் அளவுக்கு எழுத்துலகிலும், சினிமாத்துறையில் ஒளிப்பதிவாளராகவும் வெற்றிக்கொடி கட்டிப் பறக்கும் அவர் இந்த பொடியனுக்கு போன் பண்ணி பேசினது எனக்குப் பெருமை.

முதல்ல எனக்கு சொந்தமா இப்படி ஒரு வலைப்பக்கம் வெச்சிருக்கிறதைப் பத்தி நான் என்னோட நெருக்கமான நண்பர்கள் கிட்ட கூட சொன்னது கிடையாது. அவ்ளோ வெட்கப்படுவேன்.(நிஜமாதாங்க).

அப்புறம் வித்யா மற்றும் பதிவுலக முகம் தெரியா நண்பர்கள் சிலபேர் 'உங்க பதிவுகள் நல்லாயிருக்கு' ன்னு பாராட்டினதும் எனக்கு தன்னம்பிக்கை வந்துடுச்சு.

நான் எழுதின பதிவுகளை நான் மட்டுமே திரும்ப திரும்ப படிச்சு HITS கணக்கை அதிகப்படுத்த படாதபாடுபட்ட அந்த கொடுமையான நாட்களில், என்னுடைய வலைப்பதிவுகளை படிச்சு இணைய உலகத்திற்கு அறிமுகப்படுத்தி, நாலு பேருக்கு இந்த மணிப்பயலை தெரிய வெச்ச வித்யாவுக்கு கோடானுகோடி நன்றி.

என்னோட நண்பன் பார்த்திபனோட அருமை பெருமைகளைப்பத்தி 'பார்த்திபன் கனவு' ங்கற கவிதையாகவும்,

என்னோட தோழி கோமதியும் அவரோட தங்கை அபிராமியும் தன்னைப்பத்தி பெருமையா ஒரு கதை எழுதச்சொல்லி கேட்டுகிட்டதால 'கோமதி பாட்டியின் காசி யாத்திரை' ங்கற தலைப்புல ஒரு கதையும் எழுதி நண்பர்களோட பாராட்டுகளுக்கு ஆளானேன். (கோமதி நறநறன்னு பற்களை கடிக்கிறது என் காதில விழுது.)

அப்புறம் எங்க ஊரு காமெடி பீஸ் போனாகானா வை கதைநாயகனா வெச்சு எழுதின 'போனாகானா முதலியாரின் தேசபக்தி' மிகுந்த வரவேற்பைப் பெற்றது. (இது மட்டும் அந்த ஆளுக்கு தெரிஞ்சா கண்டிப்பா என்மேல கேஸ் போட்டுடுவாரு.)

அப்புறம் நானும் என் நண்பன் குண்டுசவுரியும் பள்ளிவயதில் பண்ணின குறும்புகளை வெச்சு சில கதைகள் எழுதினேன்.

தொந்தியின் பயன்களைப் பத்தி நீண்ட நாட்களா ஆராய்ச்சி பண்ணி ஒரு ஆய்வுக்கட்டுரை சமர்ப்பிச்சேன்.

வாழ்க்கையில் வழுக்கி விழுவோம்

தொந்தியின் பயன்கள்

சாமி குத்தம்

ஆகிய சில படைப்புகள் விகடனில் வந்தது எனக்கு மிகப்பெரிய ஊக்கத்தைக் கொடுத்தது.

இன்னும் நிறைய தினமும் எழுதணும்னு ஆசையா இருந்தாலும், அன்றாட மனித வாழ்வின் நெருக்கடிகளால் என்னோட கற்பனைக் குதிரை கவுந்தடிச்சி படுத்திடுது.

அதனால எப்பவாவது நிம்மதியான பொழுதுகளில் மட்டும் என்னோட வலைப்பக்கத்துல கொஞ்சம் உளறிக்கொட்டுவேன். மத்தபடி எழுத்துலகில் சாதிக்கும் அளவுக்கு நேரமும் தகுதியும் எனக்கு மிகவும் குறைவு.

ஆனாலும் ஜாக்கிசேகர் மாதிரி என்னை உற்சாகப்படுத்தும் நல்ல மனிதர்களுக்காக நானும் இன்னும் நிறைய எழுத முயற்சி பண்ணுவேன்.

நன்றி ஜாக்கிசேகர் சார்.

...

பயணிகள் கவனத்திற்கு...!

2009-12-23T18:17:00.009+05:30

வாரக்கடைசி நாள் விடுமுறைக்கு வீட்டுக்கு போயிட்டு வரலாம்னு நெனச்சி கோயம்பேடு பேருந்து நிலையத்துக்குள்ள நுழைஞ்சதும் போர்க்களத்துல நுழைஞ்சது மாதிரி இருந்தது.

உள்ள நுழையிற ஒவ்வொரு பேருந்தையும் துரத்திகிட்டு ஓடுது ஒரு கும்பல். பேருந்து நின்னுதும் ஓடிப்போயி இருக்கிற ஒரேயெரு வாசலையும் அடைச்சிடுது. பேருந்தில இருந்து இறங்கறவங்க அந்த மக்கள் வெள்ளத்துமேல நீச்சல் அடிச்சித்தான் கரையை கடக்க முடியும்.

வாரம் 5 நாளும் 'வாங்க! வாங்க! டிக்கெட் கம்மிதான்.' ன்னு வழியனுப்ப வர்றவனையெல்லாம் கூட வாய்நிறைவா சொந்தக்காரன் மாதிரி பாசமா கூப்புடுற நடத்துனருங்க சனி ஞாயிறு மட்டும் 'சீட் இல்ல. அந்தாண்ட போ!' ன்னு பிச்சைக்காரனை தொரத்துரது மாதிரி தொரத்தியடிக்கிறானுங்க.

அப்படியும் படாதபாடுபட்டு ஒரு பேருந்துக்குள்ள ஏறி உட்கார்ந்ததும் பக்கத்து சீட்ல உட்கார்ந்து இருக்கிற மனுசனோட பனிப்போர் ஆரம்பிச்சிடுச்சி.

ரெண்டு சீட்டுக்கும் இடையில இருக்கிற கை வைக்கிற கட்டைக்கு ஆக்கிரமிப்பு போர் ஆரம்பிச்சிடுச்சி ரெண்டு பேருக்கும்.

அந்த ஆக்கிரமிப்புப்போர் வெட்டுகுத்துல முடிஞ்சதும் உண்டுன்னு என் நண்பன் எப்பவோ சொன்னது என் நினைவுக்கு வந்ததால சரி போய்த்தொலையட்டும் னு ஒருதலைப்பட்சமா போர்நிறுத்தம் அறிவிச்சு விட்டுக்கொடுத்துட்டேன்.

அடுத்தது அந்த மனுசன் 'பப்பரக்கா' ன்னு நல்லா காலை நீட்டி படுத்துகிட்டு குறட்டை விட ஆரம்பிச்சிட்டாரு. அப்புறம் கொஞ்சம் நேரம் கழிச்சு கைக்குழந்தை மாதிரி என்னோட தோள்ல சாய ஆரம்பிச்சிட்டாரு. பல தடவை தூக்கி நிறுத்தியும் திரும்பத் திரும்ப சாய்ஞ்சுகிட்டே இருந்துச்சி அந்த சாய்ந்த கோபுரம். வேற வழியில்லாம நானும் அந்தாளு தலையில என்னோட தலைய முட்டுக்கொடுத்து தூங்க ஆரம்பிச்சிட்டேன்.

பேருந்து போய்க்கிட்டே இருந்துச்சு. திடீர்னு பயங்கரமான 'ங்கப்பு' மூக்கைத் துளைச்சி என்னோட தூக்கத்தை கலைச்சிடுச்சி.

என்னடான்னு கண்முழுச்சிப் பார்த்தா பேருந்து நடுக்காட்டுல ஓரமா நின்னுகிட்டு இருக்குது.

'பஸ்சு பத்து நிமிசம் நிக்கும். சாப்பிடுறவங்க சாப்புடுலாம்' ன்னு கொரலு கேட்குது.

வெளியில தலையை நீட்டி எட்டிப்பார்த்தா நடுக்காட்டுல நாலஞ்சு பேருந்து நிக்கிது ஒரு தகரகொட்டகை முன்னாடி.

கொட்டகையோட தலையில ஆளும் கட்சியோட கொடி பறக்குது. நாலு வருசத்துக்கு முன்னாடி அதே இடத்தில அப்ப ஆளும்கட்சியா இருந்து இப்ப எதிர்க்கட்சியா உள்ள கட்சியோட கொடி பறந்ததா எனக்கு ஞாபகம்.

ரொம்ப நேரமா ஆத்திரத்தோட 'அதை'யும் அடக்கிகிட்டு வந்த அப்பாவிப் பயணிங்க, பேருந்து நின்னதும் தன்னோட புலனடக்கத்தை கைவிட்டுட்டு திக்குக்கு நாலு பேரா பிரிஞ்சி ஒதுக்குப்புறம் தேடி ஓட ஆரம்பிச்சாங்க. அப்படி ஓடிப்போயி இறக்குமதிக்கு தயாரான பயணிகளை, நீளமான குச்சியை வெச்சிகிட்டு பயங்கரமான உருவத்தோட இருந்த ஒருத்தன்,

'யோவ் இங்க போவாதீங்கய்யா. ஓட்டல் பின்னாடி பாத்ரூம் இருக்கு. அங்க போங்கய்யா' ன்னு விரட்ட ஆரம்பிச்சான். இப்படி நாள்தோறும் அவசரத்துக்கு ஒதுங்கும் அப்பாவி சனங்களை விரட்டுறதுக்காகவே அவனுக்கு சம்பளம் போட்டு அங்க நிறுத்தி வெச்சிருக்கானுங்க போலிருக்கு.

பயணிகள் பல பேரு அவனோட அதட்டலுக்கு பயந்து பாரத்தை இறக்கி வைக்கும் முயற்சியை பாதியிலேயே கைவிட்டு உலகின் மிகவும் பயங்கரமான அந்த கழிவறையை நோக்கி ஓட ஆரம்பிச்சாங்க. விவரமான ஆசாமிங்க சில பேரு அந்த பிரதேசத்திலிருந்து தலைமறைவாகி பலமைல் தூரத்துக்கு நடைபயணம் செஞ்சு வெட்டவெளியில பாரத்தை இறக்கி வெச்சிட்டு திருப்தியோட திரும்பிவந்தாங்க.

ரொம்பநேரம் பக்கத்து சீட்டுக்காரனோட மண்டையிடிச்சண்டை போட்டு பாடி ரொம்ப டயர்டாயிடுச்சி. ரெண்டு தோசை தின்னுவெப்போம்னு அந்த ஓட்டல்ல நுழைஞ்சு நாற்காலியில குந்துனேன்.

சிக்குப்புடிச்ச தலைய சொறிஞ்சிகிட்டு என்கிட்ட வந்த ஒருத்தன், 'என்ன சார் சாப்புடிறீங்க?' ன்னு கேட்டுகிட்டே சட்டைக்குள்ள கைய விட்டான். மெனு கார்டு எடுக்கிறானோன்னு நெனைச்சேன். உள்ள கைய விட்டவன் அக்குளை சரட் புரட் டுன்னு சொறிய ஆரம்பிச்சிட்டான். பசி வந்தா பத்தும் பறந்து போகும்ங்கற பழமொழிக்கு மரியாதை கொடுத்து அவனோட சேட்டைகளை பொறுத்துகிட்டு 'ஒரு மசால் தோசை எடுத்திட்டு வாங்க' ன்னு சொல்லி அனுப்புனேன்.

இவனும் 'ஸ்பெஷல் மசால் தோச ஒண்ணு' ன்னு கத்திகிட்டே அடுப்பங்கரைக்கு போனான்.

கொஞ்சம் நேரம் கழிச்சு நசுங்கிப்போன ஒரு தட்டுல வெந்தும் வேகாம இருந்த ஒரு மசால் தோசைய எடுத்துகிட்டு வந்து எனக்கு போட்டு வெச்ச இலையில 'பொத்' துன்னு தூக்கி போட்டான். அப்புறம் சட்னி,சாம்பாருங்கிற பேருல சில ரசாயனக் கலவைகளை தோசை மீது ஊத்தினான். இருந்த பசிக்கு அதை தோசையோட குழப்பியடிச்சி சாப்பிட்ட உடனே என்னோட அடிவயித்தில சில ரசாயன மாற்றங்கள் நிகழ ஆரம்பிச்சிடுச்சி.

'சாப்பிடுவதால் ஏற்படும் பின்விளைவுகளுக்கு நிர்வாகம் பொறுப்பல்ல' ங்கற வாசகம் ஓட்டல் வாசலிலேயே எழுதியிருந்ததால, ஊருக்குப்போயி தீர்வுகாணலாம்னு முடிவு பண்ணி சாப்பிட்டு முடிச்சிட்டு,சர்வரை பில் எடுத்திட்டு வரச்சொன்னேன்.

சர்வர் ஒரு சில்வர் கிண்ணத்துல கசங்கின ஒரு சின்னத்தாளை வெச்சி எடுத்திட்டு வந்தான். சரி டிப்ஸ் எதிர்பார்க்கிறான் போலிருக்குன்னு முடிவு பண்ணி அதை எடுத்து தோசை விலையை பார்த்தவுடனே தலைசுத்த ஆரம்பிச்சிடுச்சி.

'என்னய்யா? ஒரு தோசை முப்பத்தி ஆறு ரூவாயா?'

'ஆமா சார். விலை கம்மிதான்' ன்னு சொல்லிட்டு கேவலமா இளிச்சான்.

ஐம்பது ரூபாய் தாளை எடுத்து அந்த கிண்ணத்துல வெச்சேன்.

போய் கல்லாவில உட்கார்ந்து இருந்த முதலாளி கிட்ட கொடுத்திட்டு அவருகிட்டேயே நின்னு ரொம்ப நேரமா பேசிகிட்டு இருந்தான்.

மீதி சில்லரை பதினாலு ரூபாயில நாலு ரூபாய் சில்லரையை அவனுக்கு டிப்ஸ் கொடுத்துட்டு மீதி பத்து ரூபாயில தோசை செரிக்கிறதுக்கு ஒரு கோக் சாப்பிடலாம்னு திட்டம் போட்டுகிட்டு நான் குந்தியிருந்தேன்.

அவன் முதலாளியோட ரொம்பநேரம் பேச்சுவார்த்தை நடத்திகிட்டேயிருந்ததால மறந்திட்டான் போலிருக்குன்னு நெனச்சி நானே நேரா கல்லாகிட்ட போய் நின்னு சர்வரை உத்துப் பார்த்தேன்.அவன் என்னை கண்டுக்கவே இல்லை. அப்புறம் தொண்டையைச் செருமி அவனோட கவனத்தை கவர நினைச்சேன். அந்த முயற்சியும் தோல்வியில முடிஞ்சது.அப்புறம் லொக்கு லொக்குன்னு இருமிப் பார்த்தேன். என்னை ஓரக்கண்ணால பார்த்தவன் திரும்பி நின்னுகிட்டு பேச்சை தொடர்ந்தான்.

வேற வழியில்லாம அவனோட தோளை தொட்டு,

'சர்வர். மீதி சில்லரை தர்றீங்களா?' ன்னு கேட்டவுடனே

'அதான் மீதி சில்லரை எல்லாத்தையும் டிப்ஸா எனக்கு குடுத்தியே சார்?' ன்னு என்னை முறைச்சான்.

'நியாயமா உங்க ஓட்டல் தோசையைத் தின்னதுக்காக நீங்கதாண்டா எனக்கு நிவாரணத்தொகையா டிப்ஸ் கொடுக்கணும்' னு ஆவேசமா கத்தினேன்(மனசுக்குள்ள.)

பரிமாறுனப்ப குழந்தை மாதிரி பிஞ்சு மூஞ்சியோட இருந்த அவனோட முகம் மீதி சில்லரை கேட்டவுடனே கொடூர குரங்கா கிராபிக்ஸ் உதவியில்லாமயே மாறினதைக் கண்டு மிரண்டுபோய் சத்தம்போடாம அந்த தகர கொட்டகையை விட்டு வெளியில வந்தேன்.

திரும்பிப் பார்க்காம பேருந்துக்குள்ள ஏறி உட்கார்ந்து கும்பகோணம் எப்படா வந்து சேரும்ங்கிற ஏக்கத்தோட ஒரு குட்டித் தூக்கம் போட ஆரம்பிச்சேன்.

பெருமூளை தூக்கத்தில இருக்கும்போது என்னோட சிறுமூளை சில சிந்தனைகளை சிதற விட்டிச்சு.

அதாகப்பட்டது,

நீண்டதூரம் பயணம் போகும்போது இடையில் சாப்பிடுவதற்கான உணவை கையோட எடுத்துகிட்டு போகணும்.

நடத்துனருகிட்ட ஏமாறாம இருக்க, சில்லரைகள் மாத்திவெச்சுக்கணும்.

ஐம்புலன்களையும் அடக்கத் தெரிஞ்சவங்க மட்டும் அந்தமாதிரி நடுக்காட்டில வழிப்பறி பண்ணும் இடங்கள்ல நிக்கும் பேருந்துல ஏறணும். மத்தவங்க இடைநில்லாப் பேருந்துல ஏறி பயணம் செய்து தன்னோட உயிரையும் உடைமைகளையும் காப்பாத்திக்கணும்.

இவைதான்ங்க தூக்க கலக்கத்தோட நான் கண்டுபிடிச்ச அந்த துக்ககரமான உண்மைகள்.

சரி நான் தூக்கத்தை கண்டினியூ பண்ணி மேலும் பல உண்மைகளை கண்டுபிடிச்சி உங்ககிட்ட அப்புறமா உளறுறேன்.இப்ப நான் தூங்கறேன்.கைப்புள்ள! இன்னும் ஏண்டா முழிச்சிகிட்டு இருக்க? தூங்ங்ங்......

கொர்ர்ர்ர்ர்ர்ர்........................................

.....

கனவு

2009-11-25T15:19:00.012+05:30

..

என்றோ ஆழ்கடலில்
மூழ்கிப்போன காற்றின்துளி
இன்று மேலெழுந்து
கொப்பளிக்கும் நீர்க்குமிழி.

நாளை உதிக்கப்போகும்
ஆதவனின் முகம் காண...
இன்றே பூத்து நிற்கும்..
மனக்குளத்தில் தாமரைப் பூ.

...

2012 பேரழிவு : அரசியல் தலைவர்கள் அறிக்கை

2009-11-23T12:45:00.006+05:30

மாயா என்றொரு இனம் தென்னமெரிக்காவில் முன்பு இருந்ததாம். கிறிஸ்து பிறப்பதற்கு இரண்டாயிரம் ஆண்டுகளுக்கு முன்பே இந்நாகரிகம் தோன்றி சமீபத்தில் பதினைந்தாவது நூற்றாண்டு வரை இருந்து வந்ததாக ஆராய்ச்சியாளர்கள் சொல்கிறார்கள். கிட்டத்தட்ட மூவாயிரத்து ஐநூறு ஆண்டுகளுக்கு உலகில் கோலோச்சிய இந்த இனம் குறித்த தகவல்கள் இன்றும் கூட விரிவான ஆராய்ச்சிகள் இல்லாமல், மர்மமாகவே இருப்பது ஆச்சரியகரமானது.

மாயர்கள் கட்டிடக்கலை, வானவியல் சாஸ்திரங்கள் மற்றும் கணித சூத்திரங்களிலும் கைதேர்ந்தவர்களாக இருந்திருக்கக் கூடும் என்று ஆராய்ச்சியாளர்கள் கருதுகிறார்கள். இதற்கு அவர்கள் உதாரணம் காட்டுவது மாயர்களின் காலண்டர். மிக நுட்பமாக கணிதவியல் பரிமாணங்கள் துணை கொண்டு மாயர்களின் காலண்டர் உருவாக்கப்பட்டிருப்பதாக கூறுகிறார்கள். மாயர்களின் காலண்டர் கி.மு. 3113ல் தொடங்கி, கி.பி. 2012-ல் நிறைவடைவது தான் இப்போது பலருக்கும் பீதியைக் கிளப்பியிருக்கிறது.

மாயமந்திரங்களிலும், வானவியல் சாஸ்திரங்களிலும் கைதேர்ந்த கில்லாடிகளான மாயர்கள் ஏன் 2012-ல் காலண்டரை முடித்துவிட்டிருக்கிறார்கள். அன்று உலகம் அழியப் போவதை பல நூற்றாண்டுகளுக்கு முன்னரே தங்கள் ஞானதிருஷ்டியால் கண்டுவிட்டார்கள் என்று கொலைவெறியோடு வதந்திகளை கிளப்பி வருகிறார்கள் பலர். ஆரம்பத்தில் தென்னமெரிக்காவிலும், பின்னர் ஐரோப்பாவிலும் சூடாக விவாதிக்கப்பட்ட ‘உலகின் கடைசி நாள்’ விவாதம், இப்போது மூடநம்பிக்கைகளில் புரையோடிப் போன ஆசிய நாடுகளுக்கும் ஒரு ரவுண்டு வந்திருக்கிறது.

சரி. மாயன் காலண்டர் என்னதான் சொல்ல வருகிறது, பார்ப்போமா?

சூரியக் குடும்பத்தில் அங்கம் வகிக்கும் பூமி 2012ஆம் ஆண்டு, சூரிய மண்டலத்தின் நேர்க்கோட்டுக்கு வருமாம். இதையடுத்து நேர்க்கோட்டிலிருந்து முன்பு பயணித்த திசையிலிருந்து நேரெதிராக விலகி பயணிக்கும்போது புவியின் காந்தப்புலங்கள் திசைமாறி, துருவங்கள் இடமாற்றம் ஏற்படும் என்பதாக மாயன் காலண்டர் கணிக்கிறது. ‘துருவங்களின் இடமாற்றம்’ என்பது ஏற்கனவே விஞ்ஞானிகளால பல ஆண்டுகளாக விவாதிக்கப்பட்டு ஓரளவுக்கு ஒத்துக்கொள்ளப்பட்ட ஒரு விஷயம். ஆனால் அது 2012ஆம் ஆண்டு தான் ஏற்படுமா என்பதை எந்த விஞ்ஞானியாலும் உறுதியாக சொல்ல இயலவில்லை.

துருவங்கள் இடம் மாறினால் நமக்கென்ன நஷ்டம் வந்தது என்கிறீர்களா?

ஒன்றுமில்லை. மலை உயரத்துக்கு சுனாமி வரும், தினம் தினம் பூம் பூம் பூகம்பம், பனிமலைகள் எரிமலைகளாக மாறிச்சீறும். ஒட்டுமொத்தமாக இயற்கைப் பேரழிவுகள் மனிதகுலத்தை ஆங்காரப் பசியோடு கபளீகரம் செய்யும். இப்படியெல்லாம் பயமுறுத்திக் கொண்டே போகிறார்கள். மாயன் காலண்டரும் இந்த ஊழிப்பெருந்தீ, மற்றும் ஊழிப்பெருநீர் வகையறாக்களை உறுதி செய்கிறது.

சூரிய மண்டலத்துக்கு ஒருநாள் என்பது, நம் பூமியின் கணக்கில் பார்த்தோமானால் 25,625 வருடங்களாம். இதை மாயர்களின் காலண்டர் ஐந்து காலக்கட்டங்களாக பிரிக்கிறது. ஒவ்வொரு காலக்கட்டமும் 5125 வருடங்களைக் கொண்டது. நான்கு காலக்கட்டங்கள் ஏற்கனவே முடிந்துவிட்டதாம். இப்போது நடைபெறுவது ஐந்தாவது காலக்கட்டமாம். கடைசிக் காலக்கட்டம். அதுவும் கூட 2012, டிசம்பர் 12ல் முடிவடைகிறதாம். எனவேதான் இதை ‘ஜட்ஜ்மெண்ட் டே’ என்று பலரும் அஞ்சுகிறார்கள்.

(நன்றி : விக்கிபீடியா)

2012 திரைப்படம் மாயன் நாட்காட்டியை அடிப்படையாக வைத்து எடுக்கப்பட்டாலும் உலக வெப்பமயமாதலால் ஏற்படப்போகும் பேரழிவினை நம் கண்முன்னே நிறுத்துகிறது.

சரி. உண்மையிலேயே 2012 ல் உலகம் அழியப்போவது உறுதியானால் நம்ம ஊரு அரசியல்வாதிகள் எப்படி அறிக்கை விடுவார்கள் என்று கற்பனை செய்து பார்த்தேன்.

கருணாநிதி

அய்யகோ! இந்த பூமிப்பந்து அழியப்போவதுகண்டு நான் மனதுக்குள் புழுங்கியழுவது யாருக்காவது தெரிகிறதா? குறளோவியம் படைப்புகள் குப்பைமேட்டில் வீழ்வதா? பொன்னர் சங்கர் காவியங்கள் மண்அரித்துப்போவதா? கண்ணகிக்கு கடற்கரையில் நான் வைத்த சிலை விண்ணுயர முட்டும் அலைகளில் கண்மறைந்து போவதா? கழுத்தினிலே நான் அணியும் மஞ்சள் துண்டு அந்த பொழுதுனிலே நஞ்சிப்போக விடலாமோ உடன்பிறப்பே? என் செல்லக்குழந்தை அழகிரிக்கு மந்திரிப் பதவி கேட்டு தலைநகர் செல்வதற்கு உதவிய அந்த தள்ளுவண்டி வெள்ளக்காட்டிலே அடித்துக்கொண்டு செல்ல விடுவதா? தமிழினமே எழுந்து வா! கைகோர்த்து நிற்போம் கடற்கரைச்சாலையிலே மனிதச்சங்கிலியாய்! கோடானுகோடி தந்திகள் அடிப்போம் கொந்தளிக்கும் கடல்அலைக்கு கண்டனம் தெரிவித்து! மூட்டை மூட்டையாக கடிதங்கள் வரைவோம் உலகம் மூழ்கிப்போவதை தடுப்பதற்கு! தளபதி பின்னாலே அணிதிரள்வீர் தமிழர்களே!

ஜெயலலிதா

இந்தப் பேரழிவிற்கு காரணமான கருணாநிதியையும் தி.மு.க மைனாரிடி அரசையும் வண்மையாகக் கண்டித்து நமது கழகத்தோழர்கள் எல்லா ஊர்களிலும் சந்துபொந்துகளிலும் வெயில் மழை பாராது கண்டன ஆர்ப்பாட்டங்களை நடத்திட உத்தரவிடுகிறேன். நான் மீண்டும் கொடநாடு எஸ்டேட் சென்று மேலும் ஆறு மாதங்கள் ஓய்வெடுத்து கருணாநிதிக்கு எதிரான ஆர்ப்பாட்டங்கள் எவ்வாறு செய்வது என்று சிந்திக்க இருக்கிறேன் என்பதனையும் இந்த அறிக்கையின் மூலம் தெரிவித்துக்கொள்கிறேன்.

ராமதாசு

இந்த சந்தர்ப்பத்திலாவது எங்களது வன்னியர் சாதியினர் வாழும் ஊர்களை தனியாகப் பிரித்து தனி தமிழ்நாடு உருவாக்கினால் நான் அந்த மாநில முதல்வராகவும் எனது மகன் அன்புமணி துணைமுதல்வராகவும் வரும் வேளையில் நாங்கள் காடுமரங்களை வெட்டித்தள்ளி நிலங்களை மேடாக்கி அதன்மேல் அமர்ந்து எங்கள் சாதியினர் தங்களது உயிரை காப்பாற்றிக்கொள்வார்கள். வாழ்க சாதிவெறி. வாழ்க தமிழ். வாழ்க இந்தியா. ஒழிக தமிழ்நாடு.

திருமாவளவன்

எரிமலைக்கு அடங்க மறுப்போம். சுனாமி அலைகளை அத்துமீறுவோம். மண்சரிவுகளிலிருந்து திமிறி எழுவோம். புயலடித்தால் திருப்பியடிப்போம். தலித்துகளுக்கென தனியான தீவு உருவாக்குவோம். வாழ்க தமிழ். ஒழிக ராஜபக்சே.

சுப்பிரமணியசாமி

2012 லே நடக்கப்போற இன்சிடென்டுக்கு எல்.டி.டி தான் காரணம். அவ்ங்களோட இந்த திட்டத்துக்கு ஹெல்ப் பண்றதா சோனியா காந்திக்கும் பிரபாகரனுக்கும் இடையில ரகசிய ஒப்பந்தம் இருக்கிறதா ஒபாமா என்கிட்ட சொல்லி வருத்தப்பட்டாரு. இது சம்பந்தமா நான் அடுத்தவாரம் சீனா அதிபரையும் ரஷ்யா பிரதமரையும் சந்திக்க இருக்கேன். யாரும் கவலைப்படாதீங்கோ. நான் பார்த்துக்கறேன். எல்லாரும் நன்னா வாழணும்ங்கிறதுக்காக எனது கட்சிக்காரா எட்டு கோடி பேரும் கருணாநிதிக்கு எதிரா ஆர்ப்பாட்டம் பண்ணுவா. அதுக்காக நான் பி.ஜே.பி கூட கூட்டணி சம்பந்தமா பேசிண்டு இருக்கேன். காங்கிரசு சென்ட்ரல் கவர்மெண்டை அடுத்தவாரம் கலைக்கலாம்னு முடிவு பண்ணிட்டேன்.

....

இன்றைய செய்திகள் (16-12-2009)

2009-11-16T17:15:00.006+05:30

செய்தி 1:

நிஜம்:

வாரிசு அரசியலை காங்கிரஸ் எதிர்க்கும் என இ.வி.கே.எஸ் இளங்கோவன் விழா ஒன்றில் பேசும்போது தெரிவித்தார்.

நிழல் :

இப்படி கூறியதன் மூலம் காங்கிரஸை நிரந்தர குத்தகைக்கு எடுத்திருக்கும் நேரு குடும்பத்திற்கு அவப்பெயர் ஏற்படுத்தி விட்டதாக உண்மையான காங்கிரஸ் தொண்டர்கள் சிலர் வேதனை தெரிவித்தனர்.

செய்தி 2:

நிஜம்:

சாதி வாரியான கணப்பெடுப்பு உடனே நடத்த வேண்டும் என்று பா.ம.க நிறுவனர் ராமதாசு தெரிவித்தார்.

நிழல் :

மேலும், அரசு நடத்தும் கட்டணக் கழிவறைகளின் முன்னால் வரிசையில் நிற்பவர்களில் கூட தனது சாதியினருக்கு முன்னுரிமை அளித்து உள்ளே அனுமதிக்கவேண்டுமென வலியுறுத்தினார்.

செய்தி 3:

நிஜம் :

இலங்கை அதிபர் ராஜபக்சேவை இந்திய நிதியமைச்சர் இலங்கையில் சந்தித்துப் பேசினார்.

நிழல் :

அப்போது,போரில் இலங்கைக்கு இந்தியா மிகப்பெரும் உதவிகள் செய்தும் தமிழர்கள் இன்னும் சிலரை மிச்சம் மீதி விட்டு வைத்திருப்பதற்கு தனது அதிருப்தியை தெரிவித்தார்.

செய்தி 4:

நிஜம் :

தர்மபுரி "கியூ' பிராஞ்ச் அலுவலகத்தில் நேற்று அதிகாலை, போலீசார் தங்களுடைய டாடா சுமோ வாகனங்களுக்கு, ஆட்டு கிடா வெட்டி திருஷ்டி பூஜை செய்தனர்.

நிழல் :

மேலும் 'மாமூல்' வாழ்க்கை பாதிக்கப்படாமலிருக்க அப்பாவிப் பலியாடுகள் பெருமளவில் சிக்குவதற்கு ஆண்டவனிடம் வேண்டிக்கொண்டனர்.

செய்தி 5:

நிஜம் :

புத்தமதத் தலைவர் தலாய்லாமா அருணாச்சல பிரதேசத்தில் தனது ஒருவார பயணத்தை முடித்துக் கொண்டு, நேற்று டில்லி திரும்பினார்.

நிழல் :

தனது பயணத்தின் மூலம் இந்தியா, சீனா இடையே சிண்டுமுடிந்திடும் வேலை மிகச்சுலபமாக முடிந்ததாக பெருமிதத்துடன் தெரிவித்தார்

செய்தி 6:

நிஜம் :

தி.மு.க.வும், காங்கிரசும் இரண்டற கலந்து லட்சிய நோக்கத்தோடு செயல்படும் கட்சிகள். இரு கட்சிகளும் கூட்டாக இருந்தால் தமிழ்நாடு மட்டுமல்ல. இந்தியாவே வளமாகவும், வலிமையாகவும் இருக்கும் : கருணாநிதி பேச்சு.

நிழல் :

ஸ்பெக்ட்ரம் ஊழலில் இருகட்சிகளும் கூட்டாக செயல்பட்டதன் மூலம் தங்களது லட்சிய நோக்கத்தினை நாட்டு மக்கள் தெரிந்துகொள்ளலாம் என அவர் மேலும் தெரிவித்தார்.

...

எங்க ஊரு அதிசய மனிதர்கள் - பாகம்2

2009-11-14T16:39:00.011+05:30

புகழேந்திப்பயல்

புகழேந்திக்கு சொந்த ஊரு திருவையாறு பக்கத்தில இருக்கிற திருப்பூந்துருத்தி. கி.பி ஆயிரத்தி தொள்ளாயிரத்தி சொச்ச வருசத்துல அவன் எட்டாவது படிச்சிகிட்டு இருந்தப்ப அந்த ஊர்ல தாதாவா இருந்த காமராசு ங்கறவனுக்குப் பயந்து கிட்டு எங்க ஊருக்கு குடும்பத்தோட அகதியா வந்து சேர்ந்தான்.

நான் படிச்சிகிட்டு இருந்த பள்ளிக்கூடத்தில என்னோட வகுப்புல வந்து சேர்ந்தான்.

வந்த புதுசுல அந்தப்பய அமுக்குனியாட்டம் ரொம்ப சாதுவாத்தான் இருந்தான்.

ஒரு வாரம் கழிச்சு தன்னோட சுயரூபத்தை காட்ட ஆரம்பிச்சிட்டான்.

ஒவ்வொருத்தருக்கும் ஒரு எதிர்கால லட்சியம் இருக்கும்.

அவனோட எதிர்கால லட்சியம் தமிழ் வாத்தியார் கபிலருக்கு பைத்தியம் பிடிக்க வெக்கணும் ங்கிறதுதான்.

" தமிழ் வாத்தியாருங்க எல்லாருமே காமெடி பீஸ் தான் " னு எப்பவும் அவன் சொல்லிகிட்டு இருப்பான்.

அதனால தன்னோட இலக்கா தமிழ் வாத்தியார் கபிலரை தேர்ந்தெடுத்தான்.

பொங்கலுக்கு ஒரு வாரம் முன்னாடி கபிலருக்கு டவுசர் போட்டுகிட்டு நிக்கிற குஷ்பு படம் போட்ட பொங்கல் வாழ்த்து அட்டையை தபால்ல அனுப்பி வெச்சிட்டான்.

கொதிச்சிப்போன தமிழ் வாத்தியாரு மறுநாள் காலையில நடந்த Prayer ல தன்னோட கடும் கண்டனத்தை தெரிவிச்சாரு.

" எந்த ராஸ்கல் தறுதலை முட்டாப்பயலோ எனக்கு இந்த பொங்கல் வாழ்த்தை அனுப்பி வெச்சிருக்கான் பாருங்க."

ன்னு சொல்லி அந்தப்பொங்கல் வாழ்த்து அட்டைய, உலகக்கோப்பை போட்டியில ஜெயிச்ச கபில்தேவ் கோப்பையத்தூக்கி காண்பிச்சது மாதிரி எல்லாருக்கும் காண்பிச்சாரு.

அதப்பார்த்த பசங்க எல்லாம் விழுந்து விழுந்து சிரிச்சாங்க.

" இவனுக்கெல்லாம் எப்படி படிப்பு வரும். வாழ்க்கையில உருப்படறதுக்கு வாய்ப்பே இல்ல. இதப்பத்தி திருவள்ளுவர் என்ன சொல்லியிருக்காருன்னா......" ன்னு பாடம் நடத்த ஆரம்பிச்சிட்டாரு.

ஒருநாளு தமிழ் இலக்கணம் பத்தி பாடம் நடத்திகிட்டு இருந்தாரு.

" 'பலப்பல' , 'சிலசில' மாதிரி பிரிஞ்சா பொருள் தர்ற வார்த்தைகள் அடுக்குத்தொடர். 'வழவழ' 'கொழகொழ' ன்னு பிரிச்சா பொருள்தராத வார்த்தைகள் இரட்டைக்கிளவிகள் ஆகும். டேய் புகழேந்தி! இரட்டைக்கிளவிகளுக்கு ஒரு உதாரணம் சொல்லு " ன்னு கேட்டாரு.

புகழேந்திப்பய பவ்யமா எழுந்திருச்சி கையை கட்டிக்கிட்டு,

" நீங்க பேசறது எல்லாமே இரட்டைக்கிளவிங்கதான் சார்."

" எப்படி சொல்ற? "

" நீங்க எப்பவுமே 'வளவள' ன்னு தேவையில்லாமத்தானே சார் பேசிகிட்டு இருக்கீங்க? "

இப்படி அவன் பதில் சொன்னதும் பசங்க எல்லாரும் 'கடகட' ன்னு சிரிக்க ஆரம்பிச்சிட்டாங்க.

வாத்தியாருக்கு 'பொசபொச' ன்னு கோவம் வந்துடிச்சி.

உடனே குச்சிய எடுத்து புகழேந்திய 'படபட'ன்னு போட்டு வெளுத்து எடுத்துட்டாரு.

அடிதாங்க முடியாம அவன் 'பொலபொல' ன்னு கண்ணீர் விட ஆரம்பிச்சிட்டான்.

இப்படியா அவருக்கு பலப்பல சேட்டைகள் செஞ்சி அவரை தெனாலி படத்துல கமல் ஜெயராமை படுத்தி வெக்கிறது மாதிரி படாத பாடு படுத்தி வெச்சிகிட்டு இருந்தான்...

கொண்டு வந்து மனைப்புகுந்து
குலாவு பாதம் விளக்கியே
மண்டு காதலின் ஆதனத்திடை
வைத்தருச்சனை செய்தபின்
உண்டி நாலு விதத்திலாறு
சுவைத்திறத்தினில் ஒப்பிலா
அண்டர் நாயகர் தொண்டர் இச்சையில்
அமுது செய்ய அளித்துளார்.

பெரியபுராணத்துலயோ எதுலயோ வர்ற இந்த மாதிரி வாயில நுழையாத பாட்டையெல்லாம் கூட எளிமையா மனப்பாடம் பண்ணிடுவான். ஆனா கணக்குப் பாடம் னாலே இவனுக்கு ஒவ்வாமை.

"கணக்கு எனக்குப் பிணக்கு. நினைத்தாலே கசக்கும் ஆமணக்கு" ன்னு தத்துவம் பேசுவான். ஒண்ணும் மூணும் கூட்டினா ஏழு வரும்னு சொல்லுவான். அந்த அளவுக்கு கணக்குல ரொம்ப பலவீனமானவன்.

அதனால கணக்கு வாத்தியார் வகுப்புக்கு வரும்போது மட்டும் தலைமறைவாயிடுவான்.

தொடரும்....

....

டமில் ஒழிக !

2009-11-06T20:33:00.012+05:30

ரெட் ஜெயன்ட் முவீஸ்

சன் பிக்சர்ஸ்

காமெடி டைம்

டீலா நோ டீலா

ஹாலிவுட் டைம்

SUN TV

K TV

SUN NEWS

SUN MUSIC

JAYA TV

JAYA PLUS

JAYA MAX

செம்மொழித் தமிழை எப்படியெல்லாம் அரும்பாடுபட்டு காப்பாற்றுகிறார்கள் பாருங்களேன்!

தமிழ் இனி மெல்லச் சாகாது.இவர்கள் போகும் வேகத்தைப் பார்த்தால் சீக்கிரமாகவே செத்து விடும் போலிருக்கிறது.

அய்யோ! கொலை பண்றாங்கோ!! (தமிழை) கொலை பண்றாங்கோ! கொலை! கொலை!....

...

பொக்கிஷம் திருடின கந்தசாமி போல் ஒருவன்

2009-11-04T18:57:00.006+05:30

என்னத்த எழுதறதுன்னு தெரியல. எழுதாம இருக்கவும் முடியல. கொஞ்ச நாளு எழுதாம விட்டுட்டா, இந்தப்பய எங்க போய்த்தொலைஞ்சான்னு யாரும் கவலைப்படறது இல்ல.

இலங்கைத் தமிழர்களுக்காக உண்மையாகவே கத்திக்கிட்டு இருந்த மத்த கட்சி மந்திரிகளையெல்லாம் கழட்டி விட்டுட்டு, பாசமிகு காங்கிரஸ் மந்திரிகளை மட்டும் கூட்டிக்கிட்டு இலங்கைக்கு ஜாலி டிரிப் அடிச்சிட்டு வந்த டி.ஆர்.பாலு அண்ணன், கனிமொழி அக்கா மாதிரிதான் இந்த பதிவுலக நண்பர்களும் போலிருக்கு. என்னத்தச் சொல்ல.

நான் என்ன பொக்கிஷம் படத்துல வர்ற சேரனா? இடைவெளியே இல்லாம இடைவேளை வரைக்கும் தொடர்ந்து எழுதிகிட்டு இருக்கிறதுக்கு.

அந்தப் படத்துலதான் நாற்பது வயசு இளம் கதாநாயகன் சேரன் தன்னோட காதலிக்கு மூணு மணி நேரமா மூச்சு விடாம காதல் கடிதம் எழுதித் தள்ளிகிட்டே இருந்து, கடைசியில மூச்சை விட்டுடுவாரு. ஆனா தியேட்டருக்கு படம் பார்க்க வந்த அப்பாவி மக்கள் படம் ஆரம்பிச்சு அரைமணி நேரத்திலேயே வாயால மூச்சு விட ஆரம்பிச்சிட்டாங்க. அதாகப்பட்டது, குறட்டை விட ஆரம்பிச்சிட்டாங்க.

கடல்ல மூழ்கும் கப்பலை கதையா வெச்சி வெளிவந்த டைட்டானிக் படத்தைப்போலவே ஒரு படம் எடுக்க ஆசைப்பட்டு, தயாரிப்பாளரை கடன்ல மூழ்க வெச்சிட்டாரு பாவம்.

பணக்காரனுங்க கிட்ட இருக்கிற பணத்தைப் பிடுங்கி ஏழைமக்களுக்கு வாரி வழங்குற வள்ளல்கள் பத்தி ஏற்கனவே பலபேரு படமெடுத்து அவங்க பணக்காரங்களாயிட்டாங்க. பல படங்கள்ல பயன்படுத்தப்பட்டு கந்தையாகிப் போன அந்த கதையை வெச்சி 'கந்தசாமி' ன்னு விக்ரம் நடிச்ச ஒரு படம் வந்துச்சி.

படம் எடுக்க வீடியோ காமிரா பயன்படுத்தினாங்களா இல்ல ஸ்டில் காமிராவில போட்டோ புடிச்சி வரிசையா ஒட்டவெச்சிட்டாங்களான்னு தெரியல. ஓரு நிமிசத்துல ஓராயிரம் ஃபிரேம்கள் மாறுது. அதைப் பார்த்தா கண்ணுக்குக் கீழ கருவளையம் ஏறுது.

அந்தப் படத்தைக் காசு கொடுத்து பார்த்த ஏழை அப்பாவி மக்கள் தியேட்டரில் 'நொந்தசாமி' ஆனார்கள் என்பதை நான் சொல்லித்தான் உங்களுக்குத் தெரியணுமா என்ன?

அப்புறம் 'உன்னைப்போல் ஒருவன்'ன்னு ஒரு படம்.

இந்தியில 'A Wednesday' ங்கற பெயரில வெளிவந்து வெற்றிகரமா ஓடுன படத்தை தமிழ்ல இந்தப் பேருல எடுத்திருக்காங்க.

காலையில எழுந்திருச்சி காய்கறி வாங்கப்போறேன்னு வீட்டுக்காரம்மா கிட்ட சொல்லிட்டு வெளியில கிளம்பி போற கதாநாயகன் கமல், ஒரு மொட்டை மாடிமேல ஏறி குத்தவெச்சி குந்திகிட்டு, ஊருக்குள்ள பல இடங்களில் வெடிகுண்டு வெச்சி இருக்கிறதா கமிசனர் மோகன்லாலுக்கு போன் பண்ணி அவருக்கு வயித்தால போவ வெக்கிறாரு.

'யோவ் என்னய்யா இப்படி சின்னப்புள்ளத்தனமா பண்ணிபுட்ட. எங்கங்க வெச்சிருக்கன்னு சொல்லுயா ங்கொய்யால.' ன்னு கமிசனரு காட்டமா கத்துறாரு.

'அதச்சொல்லணும்னா ஜெயில்ல இருக்கிற என்னோட தோஸ்துங்க நாலு பேரை வெளியில வுடுய்யா' ன்னு கமல் மிரட்டுறாரு.

'சரி. எங்கன அந்த நாதாரிப் பயலுங்கலை இட்டாந்து வுடனும்?' ன்னு கமிசனரு கேட்குறாரு.

'ஊருக்கு ஒதுக்குப்புறமா இருக்கிற பழைய விமான தளத்துக்கு இட்டாந்து வுடு. அங்க ஒரு ஜுப் நிக்கும். அதுல ஏறி அவனுங்களை உட்கார சொல்லிட்டு திரும்பிப்பார்க்காம நீ ஓடிப்போயிடு' ன்னு கமல் சொல்றாரு.

அவரு சொன்னமாதிரியே அந்த நாலு தடிப்பயலுங்களையும் ரெண்டு போலீசு காரனுங்க தறதறன்னு இழுத்துட்டுப்போயி அந்த விமான தளத்துக்குள்ள தொறத்தி விடறாங்க. அந்த கேடிப்பயலுங்க சந்தோசமா ஓடிப்போயி அந்த ஜுப் உள்ள ஏறி உட்கார்ந்துகிட்டு பாட்டு கேட்குறதுக்காக பிளேயரை ஆன் பண்ணுறானுங்க.

உடனே பிளேயரில ' துன்பம் தொலைந்தது இப்போ' ன்னு பாட்டு கேட்குது. அடுத்த நொடி படார்னு வெடிச்சி சிதறுது.

'என்னய்யா இப்படி பண்ணிபுட்ட?. உண்மையில நீ யாருய்யா?'ன்னு கமிசனரு கமல் கிட்ட கேட்க,

கமல்
'உன்ன மாதிரித்தான்யா நானும். நீ மட்டும் உனக்குப் பிடிக்காத ரவுடிங்களை எண்கவுண்டர்ல சுட்டுத்தள்ளுறயில்ல?. ஒரு அப்பாவி மனுசன் எனக்கு மட்டும் அந்த உரிமையில்லையா? நான் என்ன இளிச்சவாயனா. போங்கய்யா. போய் புள்ளகுட்டிங்களை படிக்க வையிங்கய்யா. சும்மா பிக்காரித்தனமா பேசிகிட்டு!'

ன்னு போனை கட் பண்ணிட்டு காய்கறி மூட்டையத் தூக்கி தலையில வெச்சிகிட்டு மொட்டைமாடியை விட்டு இறங்கி வீட்டுக்கு நடையக் கட்டுறாரு.

படம் பார்த்துட்டு வெளியில வர்ற சனங்களும் 'நல்ல யோசனையா இருக்கே. நாமளும் இப்படி எங்கயாவது குண்டு வெச்சிட்டு போலீசை மிரட்டலாமா' ன்னு சிந்திச்சபடியே வீட்டுக்கு நடையக் கட்டுறாங்க.

மூக்குப்பொடி வாங்குறமாதிரி வெடிமருந்தை எப்படி கமல் சர்வசாதாரணமா வாங்குறாருன்னு தெரியல. அப்புறம் அந்த வெடிமருந்து விக்கிற கேடிப்பயலை மட்டும் ஏன் மன்னிச்சி விடறாரு. அவனையும் எண்கவுண்டர் பண்ணச் சொல்லியிருக்கலாமே?

இத மாதிரி பல சந்தேகங்கள் உங்களைப்போலவே எனக்கும் வருது. ஏன்னா நானும் 'உங்களைப் போல் ஒருவன்' தானே!

.....

கோமதி பாட்டியின் காசி யாத்திரை

2009-08-31T20:16:00.007+05:30

கோமதி பாட்டி சோப்புத்தண்ணீரில் ஊறிக் கொண்டிருந்த தனது பல்செட்டை எடுத்து வாயில் மாட்டிக்கொண்டாள்.

வெற்றிலைப் பெட்டியின் உள்ளே மல்லாக்கப்படுத்து ஹாயாக உறங்கிக் கொண்டிருந்த வெற்றிலையாரை எடுத்து தனது உள்ளங்கையில் குப்புற படுக்க வைத்தாள் கோமதிபாட்டி.

தூக்கம் கலைந்து லேசாக கண்விழித்துப் பார்த்தார் வெற்றிலையார். கோமதி பாட்டி பாசமாக வெற்றிலையாரின் முதுகினை வருடி, மேலே ஒட்டியிருந்த தூசியை துடைத்து விட்டாள். பாசமாக வருடியதில் லயித்துப்போன வெற்றிலையார் மீண்டும் அயர்ந்து தூங்க ஆரம்பித்தார்.

பின்னர் சுண்ணாம்பு டப்பியில் இருந்து தனது ஆட்காட்டி விரலில் சிறிதளவு சுண்ணாம்பினை எடுத்து அதனை வெற்றிலையாரின் முதுகில் பரவலாக தடவிவிட்டாள்.

சுண்ணாம்பு பட்ட எரிச்சலில் அதிர்ச்சியாகி தூக்கம் கலைந்து வெற்றிலையார் சுதாரிப்பதற்குள் கோமதிபாட்டி அவரது காம்பு வாலை தனது விரலால் நறுக்கி தூர எறிந்தாள். வலியில் அலறித்துடித்த வெற்றிலையார் எழ முயற்சிக்கும்போது அவரின் முதுகில் பாக்குப் பாறைகளை கொட்டி, சிறிது சீவல் குப்பைகளையும் அள்ளித்தெளித்து அமுக்கினாள். வெற்றிலையார் கதறக் கதற அவரது உடலை இரண்டு, நான்கு, எட்டு மடிப்புகளாக மடித்து தனது பல்செட்டின் கடைவாய்ப்பகுதியில் வைத்து கடித்துக் குதறி கொன்றாள். சத்தத்தின் டெசிபல் அளவு மிகவும் குறைவாக இருந்ததால் வெற்றிலையாரின் மரண ஓலம் அவளது வாய்க்குள்ளேயே அடங்கிப்போனது.

வெற்றிலையாரின் செங்குருதி மட்டும் அவளது கடைவாய் வழியாக வழிந்து தரையை நனைத்துக்கொண்டிருந்தது.

கோமதி பாட்டியும் அபிராமி கிழவியும் இணைபிரியா உடன்பிறந்த சகோதரிகள்.

'பளபள' வென இருக்கும் பல்செட்டை மாட்டிக்கொண்டு 'கொழகொழ' வென வாயில் வெற்றிலைபாக்கு மென்றுகொண்டு 'வழவழ' வென எப்போதும் பேசிக்கொண்டு காலம் தள்ளும் இந்த இரட்டைக்கிழவிகளை ஒருபோதும் பிரிந்து பார்க்கவே முடியாது.

ஆனால் காலம் அவர்களை இப்போது பிரிய வைத்துவிட்டது.

அதாகப்பட்டது, கோமதிப்பாட்டி காசியாத்திரை போவதென்று முடிவெடுத்து விட்டாள்.

அவள் காசியாத்திரை போவதற்கு காரணம் புண்ணியம் தேடி அல்ல. தனது தொல்லை தாங்காமல் இருபது வருடத்திற்கு முன் வீட்டை விட்டு ஓடிப்போன தனது கணவன் புண்ணியகோடியைத் தேடி.

(அறுபது வருடங்களுக்கு முன்.......(ஃப்ளாஷ்பேக்))

கோமதிக்கு வீட்டில் மாப்பிள்ளை பார்க்க ஆரம்பித்தார்கள்.

'அம்மா. எனக்கு நீங்க யாரும் மாப்பிள்ளை பார்க்க வேணாம். எனக்கு நானே பார்த்துக்கிறேன்.'

'ஏண்டி இப்படி சொல்லுற?'

'அம்மா. நான் ஒரு லட்சியத்தோட இருக்கேன். எனக்கு கோடீஸ்வரன் மாப்பிள்ளை வேண்டாம். ஒரு அன்னாடம் காய்ச்சியை கல்யாணம் பண்ணிக்கணும்ங்கிறதுதான் என்னோட வாழ்க்கையின் லட்சியம்.'

அம்மா கடுப்பாகி 'எக்கேடோ கெட்டுத்தொலை' என்று திட்டிவிட்டு அடுப்பங்கரைக்குச் சென்றுவிட்டாள்.

கோமதி தனது சகோதரி அபிராமியை உடன் அழைத்துக்கொண்டு தனது 'லட்சியப்புருசனை' தேடி தெருத்தெருவாக அலைந்து திரிந்தாள்.

ஒருநாள் தனது லட்சியப்புருசனை தெருக்கோடியில் கண்டெடுத்தாள்.

சிக்குப்பிடித்த தலையுடனும் வயிறு வரை தாடியுடனும் 'ஙங ஙங' என்று தலையை சொறிந்தபடி ஒருவன் தெருக்கோடியின் பிளாட்பாரத்தில் உருண்டு கிடந்தான்.

அவனை நெருங்கிய கோமதி அவனை எழுப்பிவிட்டாள்.

'என்னை கல்யாணம் பண்ணிக்கிறீங்களா?'

'கல்யாணம் பண்ணிகிட்டா தினமும் எனக்கு சோறு போடுவீங்களா' என்று அவன் திருப்பிக்கேட்டான்.

'கண்டிப்பா போடுவேன் அத்தான்' என்றாள் கோமதி.

ஒரு குண்டான் பழைய சோற்றினை ஒரே வாயில் தின்றதுபோல் அவன் மகிழ்ச்சியில் துள்ளிக்குதித்தான்.

திருமணம் நடந்தது.

திருமணம் முடிந்ததும் முதல் வேளையாக அவனது கெட்டப்பை மாற்ற விரும்பினாள் கோமதி.

தனது வீட்டின் கொல்லைப்புறத்தில் துருப்பிடித்துக்கிடந்த புல்வெட்டும் கத்தரிக்கோலை கொண்டுவந்து, புண்ணியகோடியை உட்கார வைத்து அவனது தலையில் வளர்ந்திருந்த அடர்ந்த புதரினை வெட்ட ஆரம்பித்தாள்.

அந்நேரம் அவனது தலையில் 'பேன்கள் மாநாடு' நடந்துகொண்டிருந்தது. மேடையில் பேன்களின் தலைவர் பேசிக்கொண்டிருக்க ஆயிரக்கணக்கான பேன்கள் மேடைமுன்பு அமர்ந்து அவரது பேச்சினைக் கேட்டு கைதட்டி ஆரவாரம் செய்துகொண்டிருந்தனர்.

'நண்பர்களே! இந்த மனிதப்பயல்கள்தான் தலையில் அழுக்கினை ஸ்டாக் வைத்து நமது இனத்தினை உருவாக்குகிறார்கள். பின்னர் ஏன் நாம் வளர்ந்த பிறகு சீயக்காய்,ஷாம்பு போன்றவற்றினை தடவிக்குளித்து நம் இனத்தினை அழிக்கின்றனர்?

இவ்வளவு தீங்குகள் செய்தாலும் நாம் அவர்களுக்கு நன்மைகள்தானே செய்கிறோம். அதாவது அவர்கள் அடிக்கடி அயர்ந்து தூங்கி பொழுதினைப்போக்கி சோம்பேறிகளாக மாறிவிடக்கூடாது என்ற நல்லெண்ணத்தில் நாம் அவர்களது மண்டையினை கடித்துக்குதறி அவர்களை தூங்கவிடாமல் எப்போதும் சுறுசுறுப்பாக இயங்க வைக்கிறோம்.இதுகூட புரிய வில்லையா இந்த மரமண்டைகளுக்கு?. ஆனால் நாம் குடியிருக்கும் இந்த தலைக்குச் சொந்தக்காரன் புண்ணியகோடி மிகவும் நல்லவன். இதுவரை பல வருடங்களாக தனது தலையில் ஒரு சொட்டு தண்ணீர் கூட படாமல் நம்மை பாதுகாக்கிறான்.எனவே புண்ணியகோடி வாழ்க! வாழ்க! சீயக்காய், ஷாம்பு ஒழிக! ஒழிக!' என கோஷமிட்டார்.

திடீரென ஓர் ஆயுதம் தனது இருப்பிடத்தினை தாக்கி அழிப்பதனை கண்ட பேன்கள் கூட்டம், அலறியடித்தபடி சிதறியோடினர்.

'ஆ! ஆபத்து! இவ்வளவு காலம் நமது இனத்தினை பாதுகாத்து வந்த புண்ணியகோடியா இப்படி செய்வது?'

'தலைவா! இது புண்ணியகோடியின் செயல் அல்ல. அவனது புதுப்பெண்டாட்டி கோமதியின் சதிச்செயல்'

'ஆ! அப்படியா! ஒற்றர்படை வீரனே! உடனே நீ ஓடோடிச்சென்று அந்த கோமதியின் தலையில் வாழும் நமது இனத்தவரிடம் சென்று அவள் தலைமீது தாக்குதல் நடத்துவதற்கு கட்டளையிட்டுவிட்டு வா!'

ஒற்றர்படை வீரன் வேகவேகமாக ஓடோடிச்சென்று கத்தரிக்கோல் வழியாக கோமதியின் கையில் ஏறி பாஸ்போர்ட், வீசா எதுவுமின்றி அண்டை நாடான கோமதியின் மண்டையினை வந்தடைந்தான்.

அங்கு அசதியில் தூங்கிக்கொண்டிருந்த பேன்கள் கூட்டத்தினை எழுப்பி நடந்ததை விளக்கினான்.

கோபமடைந்த பேன்கள் கூட்டம் தங்களது ஆயதங்களாகிய வாயினால் கோமதியின் உச்சந்தலையில் கடித்துக்குதறி ஆக்ரோஷமான தாக்குதலை நடத்தினர்.

அரிப்பு தாங்கமுடியாமல் கோமதி புண்ணியகோடியின் புதர் மண்டிய தலையினை சீர்திருத்தும் பணியினை கைவிட்டுவிட்டு தனது இரண்டு கைகளினாலும் தனது உச்சந்தலையினை 'வரட் சரட்' டென்று சொறிய ஆரம்பித்தாள்.

பின்னர், பாசமிகுதியினால் தனது கணவனுக்கு எப்போதும் சுடச்சுட பூரி, இட்லி,தோசை, பிரியாணி வகைகளை சமைத்துப்போட்டாலும் அவை எதுவுமே அவனுக்கு பிடிக்காமல் போனது. குண்டான் நிறைய பழையசோறு சாப்பிட வேண்டும் என்று ஒருநாள் அடம்பிடித்தான் புண்ணியகோடி.

கோபமடைந்த கோமதி அவனை தரதரவென இழுத்துப்போட்டு தூக்கிப்போட்டு மிதித்து சுளுக்கெடுத்தாள்.

வலி தாங்கமுடியாமலும் பழையசோறு திங்கவேண்டும் என்ற தனது நீண்டநாள் ஆசையினை நிறைவேற்றிக்கொள்ளவும் ஒருநாள் வீட்டை விட்டு ஓடிப்போனான் புண்ணியகோடி.

(ஃப்ளாஷ்பேக் முடிந்தது.)

பல்செட் மாட்டிக்கொண்டு, சீடையினை தின்றுகொண்டு கோமதி கிழவி தொலைக்காட்சியினை பார்த்துக்கொண்டிருந்தாள்.

அப்போது 'நான் கடவுள்' படத்தின் பாடல் காட்சி ஒன்று ஒளிபரப்பானது.

அதில் காசியில், கங்கையாற்றின் படித்துறையில் கதாநாயகன் ஆர்யா ஒரு சாமியாரை தூக்கிப்போட்டு மிதித்து பிறகு பறந்துபோய் அவனது தொந்தியின் மேல் 'நங்' கென்று சம்மணமிட்டு அமர்ந்து தியானம் செய்ய ஆரம்பித்தார்.

கீழே கிடந்த அந்த சாமியார் அச்சு அசல் புண்ணியகோடி போல இருந்தான்.

மகிழ்ச்சியில் திளைத்தாள் கோமதி பாட்டி.

'அடியேய் அபிராமி! உன்னோட அத்தான், அதான் என்னோட கணவர் காசியிலதாண்டி இருக்கிறாரு. அவரை எப்படியாவது கண்டுபிடிச்சி பழையசோறு கொடுத்து சமாதானம் பண்ணி ஊருக்கு கூட்டிகிட்டுவந்துடறேன். நீ வீட்டை பத்திரமா பார்த்துக்க. நான் போய்ட்டு வர்றேன்.'

என்று மறக்காமல் ஒரு தூக்குச்சட்டி நிறைய பழையசோற்றினை அள்ளி அமுக்கிக்கொண்டு தனது கணவனைத்தேடி காசிக்குப் புறப்பட்டாள் கோமதி பாட்டி.

...

நில்..கவனி..சாப்பிடு!

2009-07-14T18:35:00.009+05:30

காலையில் அலுவலகம் புறப்படுவதற்காக அவசர அவசரமாக சாப்பிட அமரும்போதுதான்,

'உங்கள் குழந்தைக்கு வயிற்றுப்போக்கா? சீதபேதியா? காலராவாக இருக்கலாம். உடனே ஒரு தேக்கரண்டி உப்புடன் ஆறு தேக்கரண்டி சர்க்கரையை கரைத்துக்கொடுங்கள்.'என்று தொலைக்காட்சியில் விளம்பரம் ஒளிபரப்பாகும்.

மதியம் சாப்பிட அமரும் நேரத்தில்,

'உங்களுக்கு இருமலா? சளியுடன் ரத்தமும் வருகிறதா? தொடர்ந்து காய்ச்சலா? காசநோயின் அறிகுறிகளாக இருக்கலாம். உடனே அருகிலுள்ள சுகாதார மையத்தினை அணுகுவீர்!' என பாசமுடன் ஆலோசனை வழங்குவார்கள்.

இரவு நேரம் டின்னராவது நிம்மதியாக சாப்பிடலாம் என்றால் அப்போதுதான் விளம்பரத்தில்,குளோசப் காட்சிகளில் டாய்லெட்டை காண்பித்தபடி டாய்லெட் கழுவும் பாட்டிலை எப்படி உபயோகிப்பது என்று செய்முறை விளக்கம் அளிப்பார்கள்.

இப்படியாக எது எதற்கோ காசு செலவு செய்து விளம்பரம் செய்கிறார்கள்.

இந்த மக்களுக்கு 'பொது இடங்களில் நாகரீகமாக சாப்பிடுவது எப்படி?' என்று விளம்பரம் செய்தால் நல்லாயிருக்கும்.

'பந்திக்கு முந்திக்கொள்' என்று நம் முன்னோர்கள் பழமொழி கூறினார்களே தவிர 'பந்தியில் நாகரீகமாக சாப்பிடு' என்று ஏனோ கூற மறந்து விட்டனர்.

சாப்பிடுவதில் ஒவ்வொருவரும் ஒரு ரகம்.

ஒரு சிலர் சாதத்தினை கொத்தாக கையெறிகுண்டு போல உருட்டி அண்டைநாட்டின் மீது வீசுவது போல கோபமாக தொண்டைக்குழியை நோக்கி வீசி தாக்குதல் நடத்துவார்கள். வீசப்பட்ட கொத்துக்குண்டானது வாயின் பக்கவாட்டுச்சுவற்றில் மோதி சிதறி தொண்டைக்குழிக்குள் விழுந்து காணாமல் போகும்.உடனே அடுத்த கொத்துகுண்டினை தன் கைப்பட உருவாக்கி அடுத்த தாக்குதலை தொடங்குவார்கள்.

பாசமிகுதியால் சிலர் தனது குழந்தையை பள்ளியின் வாசல் வரை வந்து விட்டுவிட்டு திருப்தியுடன் வீட்டிற்கு திரும்பிச்செல்வார்கள்.

அதுபோல ஒரு சிலர், சாதத்தினை உள்ளங்கையில் அள்ளி அதனை தனது அய்ந்து விரல்களையும் உள்நாக்கு வரை உள்ளே விட்டு வழியனுப்பிவிட்டு திருப்தியுடன் கைவிரல்களை வாய்ச்சிறையிலிருந்து விடுதலை செய்வார்கள்.

ஒரு சிலர் மாற்றான்தாய் மனப்பான்மையுடன் சாதத்தினை எடுத்து வாயின் வாயிலாகிய உதட்டிலேயே வைத்து கூரியர் அனுப்பி விட்டு அவசரமாக திரும்பி விடுவர். வாயானது அந்த உணவினை உள்ளே அனுப்புவதற்காக இரண்டு உதடுகளையும் முத்தம் கொடுப்பது போல குவித்து, மூஞ்சியினை கூம்பு வடிவத்தில் அஷ்டகோணலாக மாற்றி உணவுடன் காற்றினையும் சேர்த்து, 'ஊவ்வ்வ்வ்வ்வ்வ்ஸ்ஸ்' என்ற நாராசமான சத்தத்துடன் உள்ளிழுத்துக்கொள்ளும்.

கைவிரல் நகம் வரைமட்டுமே உணவு படும்படி நாசூக்காக சாப்பிடுபவர்களும் உண்டு.
உள்ளங்கையிலிருந்து முழங்கை வரை சாம்பார்,காரக்குழம்பு,ரசம்,பாயசம்,மோர் ஆகிய ஐந்தருவிகளும் வழிந்து ஓடும்படி சாப்பிடுபவர்களும் உண்டு.

திருமணம்,ஓட்டல் போன்ற பொது இடங்களில் சாப்பிடும்போது ஒருசிலர்,

'எனக்கு ரெண்டு நாளா வயிறு சரியில்ல. கடமுடான்னு சத்தம் கேட்டுகிட்டே இருக்கு. வாந்தி வர்றது மாதிரியும் இருக்கு.வாய்வுத்தொந்தரவும் இருக்கு' என்று பேசி அருகில் ருசித்துச் சாப்பிட்டுக்கொண்டிருப்பவர்களை வாந்தியெடுக்க வைத்துவிடுவார்கள்.

இன்னும்சிலர் எதுவும் பேசாமல் செய்கைகளாலேயே, அதாவது சாப்பிடும்போது காது குடைவது,மூக்கு குடைவது தலையை வரட், வரட்டென்று சொறிவது, 'ஏவ்வ்வ்வ்வவ்வ்வ்வ்;....'என்று மிக நீளமாக பக்கத்து ஊருக்கு கேட்கும் வகையில் ஏப்பம் விடுவது போன்ற செயல்களை செய்து பக்கத்தில் சாப்பிடுபவரை பாதியில் பதறியோட வைப்பர்.

ஒரு சிலர் அவசர அவசரமாக சாப்பிட்டு முடித்து விட்டு, சாப்பிட்ட இலையினை சுத்தம் செய்யும் பணியினை நிதானமாக தொடங்குவர். தனது ஆட்காட்டி விரலினால் அங்குலம் அங்குலமாக வழித்து, விரலை நக்கி நக்கி சுத்தம் செய்து, பூதக்கண்ணாடி வைத்துப்பார்த்தாலும் ஒரு பிசிறு கூட உணவுத்துகள் கண்ணில் சிக்காத அளவிற்கு இலை சுத்தமான திருப்தியுடன் அரைமணி நேரம் கழித்தே இலையினை அடக்கம் செய்வர்.

இன்னும் சிலர், நுனிப்புல் மேயும் மாடுபோல எல்லா உணவு வகைகளிலும் பாதி மிச்சம் வைத்து விட்டு இலையினை மூடி வைக்காமலே எழுந்து சென்று விடுவர். போர்க்களம் போல் காட்சியளிக்கும் அந்த இலையினை தப்பித்தவறி பக்கத்திலிருப்பவர் பார்த்து விட்டால் அருவருப்பில் தனது இலையினையும் மூடி வைத்துவிட்டு ஓடி விடுவார்.

திருமண வீட்டில் சாப்பிடுபவர்களை இரண்டு வகையாக பிரிக்கலாம்.

முதல் வகையினர், நிதானமாக ஆட்டத்தினை சாம்பாரில் தொடங்கி, அதிரடியாக பாயசம் வரை வந்து ரன் குவித்து விட்டு, மேற்கொண்டு சாப்பிட முடியாமல் வயிறாகிய கம்பெனியானது 'No Vacancy' போர்டினை வாசலில் தொங்கவிட்டு விடுவதால் 99 ரன்னில் அவுட்டாகும் டெண்டுல்கர் போல, மோர் சாதம் சாப்பிட முடியாமல் பந்தியினை விட்டு சோகமாக வெளியேறுவர்.

இரண்டாவது வகையினர் டிராவிட் ரகம். பந்தியினை தொடங்கியதும் கொஞ்சம் சாம்பார்சாதம், கொஞ்சம் ரசம் சாதம் என்று நிதானமாக ஆட்டத்தினை தொடங்கி, வெற்றிகரமாக மோர் சாதம் வரை வந்துவிடுவார்கள். நேரம்தான் வீணாகுமே தவிர கொஞ்சமாக மட்டுமே சாப்பிட்டு இருப்பதால் பசி அடங்காது. எனவே அடுத்த பந்தியாகிய ஓவரிலும் தனது ஆட்டத்தினை சாம்பார் சாதமாகிய முதல் பந்திலிருந்து மீண்டும் தொடங்குவர். இப்படியாக பரிமாறுபவராகிய நடுவர் பந்தியாகிய மைதானத்திலிருந்து விரட்டிவிடும்வரை தனது ஆட்டத்தினை அவுட் ஆகாமல் தொடர்ந்து கொண்டேயிருப்பர்.

எனவே, இதைப்படித்துக்கொண்டிருக்கும் எனது அருமை தமிழ்மக்களே! எனது இந்த கட்டுரையை நகல் எடுத்து இனி உங்கள் வீட்டில் நடக்கும் வீட்டு விசேஷங்களுக்கு சாப்பிட வரும் நபர்களுக்கு இலவசமாக விநியோகிக்கவும்.அதைப்படித்து முடித்தவுடன் வந்தவர்களை வரிசையில் நிற்க வைத்து இந்த கட்டுரையிலிருந்து சில கேள்விகள் கேளுங்கள். அந்த பரிட்சையில் வெற்றிபெறும் நபர்களை மட்டும் பந்தியில் சாப்பிட அனுமதியுங்கள்.
இப்படி செய்வதன் மூலம் எதிர்கால நாகரீக சாப்பாட்டு ராமன்களை உருவாக்கிய பெருமை உங்களைச் சேரும்.

இன்னும் நிறைய உங்களிடம் சொல்லணும்னு தோணுது. ஆனா லேசா பசிக்கிற மாதிரி இருக்குது. இருங்க. சாப்பிட்டுட்டு வந்து உங்களை மீண்டும் சந்திக்கிறேன்.அப்ப நான் வர்ட்ட்டா.... வணக்கம்.

.

வாழ்க்கை

2009-07-10T15:14:00.005+05:30

கரையிலிருந்து..

நீரில் விழுந்து..

நெடும் பயணம் தொடங்கியது. – மீண்டும்

கரை ஒதுங்கும் இடம்தேடி-

ஓர் ஒற்றை இலை.

.

நகரத்துச் சொர்க்கம் : நங்கநல்லூர்

2009-07-10T13:49:00.006+05:30

நங்கநல்லூர்!

சென்னை என்ற பரந்து விரிந்த பாலைவனத்தில் ஓர் அதிசய அமைதிப்பூங்கா.

மொட்டைமாடியில் நின்று பார்த்தால் கண்ணுக்கெட்டிய தூரம் வரை தெரியும் தென்னை மரங்களின் பசுமை.

விடியற்காலையில் கேட்கும் பூஜை மணியோசைகள்.

ஒவ்வொரு வீட்டிலிருந்தும் வெளிவரும் சாம்பிராணி புகை மண்டலத்தில் கரைந்துபோகும் மனதின் அழுத்தங்கள்.

மாலை நேரங்களில் கேட்கும் மனதை மயக்கும் சங்கீத கீர்த்தனைகள்.

நேர்த்தியான சாலைகளில் நிதானமாக பயணிக்கும் வாகனங்கள்.

வறுமையின் எச்சத்தினைக்கூட காணாத வளம் மிக்க மனிதர்கள்.

32 அடி உயர ஆஞ்சநேயர் வீற்றிருக்கும் ஆலயம், நங்கநல்லூரின் அடையாளச்சின்னம்.

தென்னைமர உயர ஆஞ்சநேயரை தரிசிக்க வரும் பக்தர்கள் பலர்; தொன்னையில் வைத்துக் கொடுக்கப்படும் சுவையான பிரசாதத்திற்காக வரும் பக்தர்கள் சிலர் என்று எப்போதும் கூட்டத்தினால் நிரம்பி வழியும் அந்த ஆலயம்.

கிட்டத்தட்ட அனைத்து வங்கிகளுமே அந்த ஊரில் குடிகொண்டுள்ளன.

நள்ளிரவின் அமைதியில் தெருக்களில் அச்சமின்றி நடைபயிலும் தம்பதிகளை அங்கே காண முடியும்.

இத்தனையும் மீறி,

'என் பையன் அமெரிக்காவிலே சாப்ட்வேர் இஞ்சினியரா ஒர்க் பண்றான். கல்யாணம் பண்ணிக்கிட்டு அங்கேயே செட்டில் ஆயிட்டான். மாசா மாசம் எங்க செலவுக்கு பணம் அனுப்பிடுவான். தினமும் சாட்டிங்ல என் பேரப்பிள்ளை கிட்ட பேசினாத்தான் எனக்கு தூக்கமே வரும்'

என்று பெருமையாகச் சொல்லும் சில வயதான பெற்றோரின் தனிமை வாழ்க்கை என் மனதை நெருடுகிறது.

.

விகடனில் எனது படைப்பு

2009-07-10T10:57:00.005+05:30

'சாமி குத்தம்' -சிறுகதை

என்ற தலைப்பில் என்னுடைய படைப்பு விகடன்.காம் – ல் 09-07-2009 வியாழக்கிழமை அன்று வெளிவந்துள்ளது.

விகடனுக்கு நன்றி!

http://youthful.vikatan.com/youth/manipayalstory09072009.asp

சாமி குத்தம் - சிறுகதை

2009-07-08T12:55:00.002+05:30

கத்தியின் கூர்முனை அந்த நள்ளிரவின் கருமையிலும் மின்னியது.

அந்தக்கத்தியை தன்னுடைய இடுப்பில் எடுத்து செருகிக்கொண்டான் அறிவழகன்.

'நாளைக்கு இந்நேரம் நாம என்ன நிலையில் இருப்போம்னு யாருக்கும் தெரியாது. ஆனால் இத செஞ்சுத்தான் ஆகணும். வேற வழியில்லை' என்றான் கவியரசு.

'நாம எவ்வளவு சொல்லியும் காது கொடுத்து கூட கேட்க மாட்டேனுட்டானுங்க.அவனுங்களுக்கு புத்தி புகட்டினாத்தான் நாம இந்த ஊர்ல இனிமே மனுசனா இருக்கலாம்' பற்களை நறநறவென கடித்தான் மேகநாதன்.

...........................................................................................................

அன்று மாலை ஊர் மத்தியில் நடந்த ஊர்ப்பொதுக்கூட்டத்தில் அறிவழகன் அமைதியாகத்தான் சொன்னான்.

'அய்யா! பெரியவங்க எல்லாரும் இங்க இருக்கீங்க. உங்களுக்கு நான் சொல்லித்தர வேண்டியதில்லை. ஒவ்வொரு வருசமும் நடக்கிற அம்மன் தேரோட்டம் எல்லாத் தெருவுக்கும் போகுது. ஆனா பல வருசமா எங்க மேலத்தெருவுக்கு மட்டும் வர்றதில்ல. காரணம் கேட்டா அது அந்த காலத்திலேயிருந்து வர்ற நடைமுறைன்னு சொல்றீங்க. ஆனா அது உண்மையில்லைங்க. அந்த காலத்துல எங்க தெரு ரொம்ப குறுகலா இருந்துச்சு. அதனால தேர் உள்ள வரமுடியல. ஆனா இப்பத்தான் அரசாங்கத்துல நல்ல அகலமா சாலை போட்டு கொடுத்து இருக்காங்க. அதனால இந்த வருசம் அம்மன் தேரோட்டம் எங்க தெருவுக்கும் வரணும்னு எங்க தெரு சனங்க ஆசைப்படுறாங்க. நீங்க பெரியவங்கதான் நல்ல முடிவு சொல்லணும்'

உடனே தெட்சிணாமூர்த்தி கோபமாக எழுந்தார்

'என்னப்பா! புதுசா பிரச்சினையை கௌப்பலாம்ணு வந்திருக்கியா?. உங்க தெரு வழியா எந்த வருசமும் அம்மன் போனதில்லை. அப்படி வரச்சொல்லி உங்கத்தெருவுல இருக்கிற பெரியவங்க யாரும் இதுவரைக்கும் எங்க கிட்ட கேட்டதும் இல்ல. இப்ப நீ வந்து புதுசா இந்தப்பிரச்சினையை கிளப்பாதே. போகாத தெருவுக்கு அம்மன் போனா சாமி குத்தமாயிடும். அப்புறம் ஊருக்கு ஏதாவது கெடுதி நடந்தா என்ன பண்றது? கொஞ்சம் படிச்சிட்டாலே புத்தி கோணலாயிடும் போலிருக்கு.'

'அய்யா! சாமிக்கு முன்னாடி எல்லாரும் சமம்தானுங்களே. இந்தப்பூமியை படைச்ச சாமிக்கு அந்தப்பூமியில இருக்கிற எங்க தெரு மட்டும் எப்படிங்க பிடிக்காம போகும்?. நீங்க இப்படி பண்றதால எங்க தெரு சனங்கள மத்த தெரு சனங்க ஏதோ நாயைப் பார்க்கிறது மாதிரி கேவலமா பார்க்கிறாங்க.ரொம்ப அவமானமா இருக்குங்க. கொஞ்சம் பெரிய மனசு பண்ணுங்க.'

'இதப்பாரு தம்பி! நீ எங்களுக்கு அறிவுரை சொல்லாத. என்ன பண்ணனும்னு எங்களுக்குத் தெரியும். நீ சொல்ற படியெல்லாம் நாங்க செய்ய முடியாது. உன்னால என்ன செய்ய முடியுமோ செஞ்சிக்க. முதல்ல கூட்டத்த விட்டு வெளியே போ.'

அவமானப்பட்டவனாக திரும்பினான் அறிவழகன்.

...........................................................................................................

'சரி. நாளைக்கு என்ன பண்ணனும்னு இன்னும் ஒரு தடவை சொல்றேன். எல்லாரும் கவனமா கேட்டுக்கங்க.
நாளைக்கு அந்தி நேரத்துலதான் அந்த அம்மன் தேர் நம்ம தெரு முனைக்கு பக்கத்தில வரும். அந்த நேரத்தில நாம ஆறு பேரும் திடீர்னு கத்தி அருவாளோட கூட்டத்துல நுழையணும். அங்க நின்னுகிட்டு இருக்கிற ஊர் நாட்டாமை கல்யாணசுந்தரம் கழுத்தில கத்தியை வெச்சிட்டு தேரை நம்ம தெருவுக்கு திருப்பச்சொல்லி மிரட்டணும். தேர் நல்லபடியா நம்ம தெருவை சுத்தி வந்ததும் நாம அங்கிருந்து போய் போலீசுல சரணடையனும். என்ன தண்டனை கிடைக்குதோ அதை நம்ம தெரு சனங்க நலனுக்காக நாம ஏத்துக்குவோம்.'

எல்லோரும் தலையசைத்து சம்மதம் தெரிவித்தனர்.

...........................................................................................................

மறுநாள் அம்மன் தேரோட்டம் கோலாகலமாக தொடங்கியது.

ஊரில் அனைத்து தெருக்களையும் சுற்றிவந்தபின் மேலத்தெரு முனைக்கு அருகிலிருந்த புதுத்தெருவுக்குள் நுழைய ஆரம்பித்தது.

திடீரென கூட்டத்தில் ஊடுறுவிய அறிவழகனும் அவனது நண்பர்களும் இடுப்பில் செருகியிருந்த கத்தியை எடுத்து தேர் முன்பாக நடந்து வந்துகொண்டிருந்த ஊர் நாட்டாமை கல்யாணசுந்தரத்தின் கழுத்தில் வைத்து அழுத்தினர்.

'டேய்! யாராவது கிட்ட வந்தீங்கன்னா உங்க நாட்டாமை பொணமாயிடுவாரு. மரியாதையா தேரை மேலத்தெரு பக்கம் திருப்புங்கடா!' என்று கோபமாக கத்தினான் அறிவழகன்.

தேர் மேலத்தெரு பக்கமாக திரும்ப ஆரம்பித்தது.

அப்போது திடீரென கூட்டத்திலிருந்து நான்கைந்து போலிஸார் துப்பாக்கிகளுடன் அறிவழகனையும் அவனது நண்பர்களையும் சுற்றி வளைத்தனர்.

'டேய்! மரியாதையா நாட்டாமையை விட்டுட்டு சரண்டர் ஆயிடுங்க. இல்லைன்னா, நாயைச் சுடுறது மாதிரி சுட்டு சாகடிச்சிடுவேன்.'

அறிவழகனும் அவனது நண்பர்களும் ஆயுதங்களை கீழே போட்டுவிட்டு கைகளைத்தூக்கியபடி போலீசாரிடம் சரணடைந்தனர். உடனே ஊர்மக்கள் அவர்களை சுற்றிவளைத்து தாக்க ஆரம்பித்தனர். உடம்பில் ரத்தம் வழிய அவர்களை போலீசார் தரதரவென இழுத்துச்சென்றனர்.

'நீங்க இப்படி ஒரு திட்டம் போட்டு இருக்கீங்கன்னு எனக்கு காலையிலேயே உங்க தெருக்காரன் ஒருத்தன் சொல்லிட்டான்டா. உங்களை இப்படி கையும் களவுமா பிடிக்கணும்னுதான் போலீஸ்ல புகார் கொடுத்திட்டு காத்துகிட்டு இருந்தேன். என் கழுத்திலயா கத்தி வெக்கறீங்க? ஜெயில்ல கிடந்து சாவுங்கடா!' என்று கோபமுடன் உருமினார் நாட்டாமை கல்யாணசுந்தரம்.

'நல்லவேளை! எங்க, அவனுங்க திட்டப்படி தேரு அந்தத்தெருவுக்குள்ள போயி சாமி குத்தத்துக்கு ஆளாயிமோன்னு பயந்துகிட்டே இருந்தேன். அந்த மாரியாத்தா நம்மளையெல்லாம் காப்பாத்திட்டா.'என்று பரவசமுடன் அம்மனை பார்த்து வணங்கினார் தேரின் மேல் அமர்ந்திருந்த பூசாரி கோபாலசாமி.

'சரி சரி! தேரை புதுத்தெருபக்கம் திருப்புங்கப்பா'என்று கூட்டத்தினை விரட்டினார் தெட்சிணாமூர்த்தி.

தேர் மேலத்தெரு முனையிலிருந்து புதுத்தெரு நோக்கி நகர ஆரம்பித்தது.

திடீரென பயங்கர சத்தத்துடன் தேரின் அச்சாணி முறிந்து தேர் ஒருபக்கமாக சாய்ந்தது. தேரின் மேல் அமர்ந்திருந்த பூசாரி,தேரிலிருந்து கீழேவிழுந்து தேருக்கு அடியில் நசுங்கினார். தேரிலிருந்து விடுபட்ட வேகத்தில் சக்கரமானது அருகில் நின்றுகொண்டிருந்து நாட்டாமை கல்யாணசுந்தரத்தின் மீது மோதி தூக்கி எறிந்துவிட்டு வேகமாக ஓடி, மேலத்தெருவுக்குள் நுழைந்து அறிவழகனின் குடிசை வீட்டின் சுவற்றில் மோதி கீழே விழுந்து அடங்கியது.

சாய்ந்து கிடந்த தேரின் மேல் இருந்த அம்மன், முன்பைவிட மேலும் உக்கிரமாகக் காட்சியளித்தாள்.

..........................................................................................................